ކުރީ ސަރުކާރުގެ ވާރުތަވި ދަރަނީގެ ވާހަކަ މި ސަރުކާރުގެ ވެރިން އަޑު ހަރުކޮށް ދައްކަވާއިރު ކުރީ ސަރުކާރުން ޗާޕުކުރި ފައިސާގެ ބޮޑު ބައި ކަރަދުކުރަން ލިބުނީ މި ސަރުކާރަށް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފުން ބޭއްވި ޖަލްސާއެއްގައި ގައުމުގެ ދަރަންޏާ އަދި އިގްތިސޯދީ ހާލަތު އޮތް މިންވަރަށް އަލިއަޅުވާލައްވާ ރައީސް ޔާމީން ވިދާޅުވީ، ރައީސް އިބްރާހިމު މުހައްމަދު ސޯލިހުގެ ސަރުކާރުން ފައިސާ ޗާޕުކުރި ކަމަށާ އަދި އެއާއެކު މި ސަރުކާރަށް ކުރީ ސަރުކާރުން ވާރުތަވި ދަރަނީގެ ޖުމްލަ އަދަދަކީ 160 ބިލިއަން ރުފިޔާ ނަމަވެސް ޗާޕުކުރި ފައިސާގެ 75 އިން ސައްތަ ހޭދަކުރަން ލިބުނީ މި ސަރުކާރަށް ކަމަށަ އެހެންކަމުން އެ ދަރަނީގެ ތެރެއިން ބޮޑު އަދަދު ހޭދަކުރީ މި ސަރުކާރުން ކަމަށެވެ.

މީގެ އިތުރުން އެމަނިކުފާނު ވިދާޅުވީ، ބޮޑު އަދަދަކުން ޗާޕުކުރި ފައިސާ ހޭދަކުރަން ރައީސް ޑރ މުހައްމަދު މުއިއްޒުގެ ސަރުކާރަށް ލިބުނު ނަމަވެސް އެ ފައިސާވެސް ފެން ފޮދަކާ ނުލާ ސަރުކާރުގެ ވެރިން ދިރުވާލާފައިވާ ކަމަށާ އެހެންކަމުން ކުރީ ސަރުކާރުގެ ދަރަނީގެ ވާހަކަ މި ސަރުކާރުގެ ވެރިން ދެއްކުން ޖާއިޒު ނޫން ކަމަށް ވެސް ރައީސް ޔާމީން ވިދާޅުވިއެވެ.

އެމަނިކުފާނު ވިދާޅުވީ، ކުރީ ސަރުކާރުގެ 160 ބިލިއަނަކީ ފަސް އަހަރުގެ ދައުރެއްގައި ބޭރު ކުރި ދަރަނި ކަމަށާ ނަމަވެސް މި ސަރުކާރަށް 16 މަސްވެގެން ދިޔައިރު މި ސަރުކާރުން ބޭރުކުރި ދަރަނި 130 ބިލިއަނަށް އަރައިފި ކަމަށެވެ.

ރައީސް ޔާމީން ވިދާޅުވީ ކޮންމެ ވެރިއަކުވެސް ފައިސާ ޗާޕުނުކުރާނެ ކަމަށް ވިދާޅުވެ ބައިސާ ކަނޑާއިރު މިއަދު މި ސަރުކާރުންވެސް ފައިސާ ޗާޕުކުރަން ނިންމުން ގޯސްކަމަށާ ރާއްޖޭގެ އިގްތިސޯދީ ހާލަތާ ސަރުކާރުގެ އަމަލުތައް ބޭރުގެ ގައުމުތަކުން ނުހަނު ކައިރިން ބަލަމުން ގެންދާކަމަށެވެ. އެހެންކަމުން އިގްތިސޯދީ ފިޔަވަޅުތައް ހަރުދަނާ ނުކުރާ ނަމަ ރާއްޖެއަށް ބޭރުގެ އެހީ ލިބުން ދުރުކަން އެމަނިކުފާނު ފާހަގަކުރެއްވިއެވެ.

ރައީސް ޔާމީން މިފަދައިން ވިދާޅުވެފައިވާއިރު. ރާއްޖެއިން އިގްތިސޯދީ އިސްލާހީ މާލީ ފިޔަވަޅުތައް އަވަސް ނުކޮށްފި ނަމަ ރާއްޖެ ބަނގުރޫޓުވުމުގެ ބިރު އެބައޮތް ކަމަށް ދުނިޔޭގެ މާލީ އިދާރާތަކުން އިންޒާރުދީފައިވެއެވެ. އަދި ރާއްޖޭގެ ރޭޓިންގް ވެސް އެ އިދާރާތަކުން އެއް އަަހަރުގެ ތެރޭގައި ދެ ފަހަރެއްގެ މަތިން ދަށްކޮށްފައިވެއެވެ.