ރައްޔިތުންނަށް އެދެވޭ ވަރުގެ ހިދުމަތެއް ރައީސް ޑރ މުހައްމަދު މުއިއްޒުގެ ސަރުކާރަށް ކޮށް ނުދެވިގެން އުޅެނީ އެހެން ހުރިހާ ސަރުކާރުތަކަށްވުރެ މި ސަރުކާރުގައި ވަައްކަން ބޮޑުވުމުންކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހްމަދު ވިދާޅުވެއްޖެއެވެ.

ޑރ ޖަމީލް މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން މި ސަރުކާރުގެ ވައްކަމާ ކޮރަޕްޝަން އިންސާފުވެރިކޮށް ބެލިއްޖެނަމަ ބިޑި އެޅުވޭނީ ރައީސް ޑރ މުހައްމަދު މުއިއްޒުގެ އަތްފުޅުގައިކަމަށް ޑރ ޖަމީލް ފާހަގަ ކުރެއްވިއެވެ. އަދި ދީނަށް ނަސްރު ހޯދައިދެއްވުމަށް ބޭނުންފުޅުވާނަމަ ރައީސްގެ މައްޗަށް ކުރެވޭ ތުހުމަތުތައް މިނިވަންކޮށް ތަޙްގީގުކުރަން ފުރުޞަތު ދޭނެކަމަށް ޑރ ޖަމީލް ވިދާޅުވިއެވެ.

ރައީސް މުއިއްޒު ދީނީ ކާޑު ކުޅެން އުޅެނީ ޙީލަތްތެރި ތޮގަކަށް ކަމާއި ހަމައެކަނި ނޫމަޑީގެ މައްސަލައަށް ބެލުމުންވެސް ޙައްގަށް ލޯބިކުރާ ބަޔަކު ބިރުން ފިއްކަޑައިގެން ދާނެކަމަށް ޑރ ޖަމީލް ވިދާޅުވިއެވެ.

އެގޮތުން 848 މިލިއަން ރުފިޔާ ރައްޔިތުންގެ ބައިތުލް މާލުން ބާތިލް ގޮތުގައި ނޫމަޑިން ދަމައިގަތީ މުއިއްޒުދިން ދޮގުހެކިބަހުންކަން ޑރ ޖަމީލް ފާހަގަ ކުރެއްވިއެވެ.

އެޗްޑީސީގެ ބޮޑު ކޮރަޕްޝަންގެ ތުހުމަތުވާ ކުރީގެ މެނޭޖިންގ ޑިރެކްޓަރު ފަޒުލް ރަޝީދާއި ފެނަކައިގެ ކުރީގެ މެނޭޖިންގ ޑިރެކްޓަރު މުއާޒު މުހައްމަދު ރަޝީދު މިނިވަންކޮށް ހުރުމުން އެކަމާއި ޑރ ޖަމީލް ކަންބޮޑުވުން ފާޅު ކުރެއްވިއެވެ.

އެގޮތުން ފަޒުލް މިނިވަންކޮށް މިއަދު ހުރީ ރައީސް މުއިއްޒަށް ބައި އެޅިގެން ވައްކަން ކުރީމައި ކަމާއި މުއާޒުގެ މައްޗަށް ތަހުގީގު ނުހިންގިގެން އުޅެނީ ދިން އިންޒާރެއްގެ ސަބަބުންކަމަށް ޑރ ޖަމީލް ފާހަގަ ކުރެއްވިއެވެ.

މީގެ އިތުރުން ރައީސް މުއިއްޒުގެ ޅިޔަނު އަދި އިސްލާމީ މަރުކަޒުގެ އިސް އިމާމު ފަޟީލަތުއްޝެއިޚް މުހައްމަދު ލަތީފްވެސް ކުރިން މިފަދަ އަމަލުތައް ހުއްދަ ނޫންކަމަށް ވިދާޅުވާކަމަށް ވިދާޅުވެ މިއަދު އެހުންނެވީ މުއިއްޒުގެ މައުތުޕީސް ގޮތުގައި ވަޒީފާއަށްޓަކައި މިފަދަ ކަންތަކުގައި ޙައްގު ބަސްވިދާޅުވުން ދޫކޮށްލަައްވައިގެންކަމަށް ޑރ ޖަމީލް ވިދާޅުވިއެވެ.