160 ބިލިއަން ރުފިޔާގެ ދަރަންޏެއް އޮތުމަކީ އޭގެ ޒާތުގައި ސަރުކާރު ނުހިންގެން ޖެހޭ ސަބަބެއް ނޫން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ޕީއެންއެފުން ބޭއްވި ޖަލްސާއެއްގައި ދިވެހި ރާއްޖޭގެ އިގްތިސޯދާ އަދި ދަރަންޏާ ގުޅޭ ގޮތުން ދެއްކެވި ވާހަކަފުޅުގައެވެ.

ރައީސް ޔާމީން ވިދާޅުވީ ދަރަނީގެ ބަހަނާ ސަރުކާރުގެ ގިނަ ވެރިން ދައްކަވަމުން ގެންދަވާ ކަމަށާ ނަމަވެސް އެއީ ރައްޔިތުންނަށް ޚިދުމަތްކޮށް ނުދިނުމުގައި އުޒުރަކަށް ހަދައިގެން ވާނެ ކަމަށް ނޫން ކަމަށް އެމަނިކުފާނު ވިދާޅުވިއެވެ.

އެމަނިކުފާނު ވިދާޅުވީ ދަރަނި އޮތުމަކީ ސަރުކާރެއް ހިންގުމަށް އުނދަގޫތަކެއް ދިމާވާނެ ކަމެއް ނަމަވެސް ގަވާއިދުން ދަރަނި އަދާކުރަމުން ދާނަމަ އެއީ މައްސަލައަކަށްވެ އެކަމާ ގުޅިގެން ރައްޔިތުންނަށް ފޯރުކޮށްދޭން ޖެހޭ ޚިދުމަތްތަކަށް ބުރޫ އަރާނެކަމެއް ނޫން ކަމަށެވެ.

ރައީސް ޔާމީން ވަނީ ނިމިދިޔަ ސަރުކާރުގައި ޗާޕުކުރި 4 ބިލިއަން ރުފިޔާގެ ފައިސާގެ 3.6 ބިލިއަން ލިކިއުޑީ މި ސަރުކާރު ފެށުނު އިރުވެސް ހުރި ކަމަށާ އެ ފައިސާވެސް ބޭނުންކޮށް ރައްޔިތުންނަށް ޚިދުމަތްކުރަން ފުރުސަތު ލިބުމުން ވެސް މި ސަރުކާރުގެ ވެރިން އެ ފައިސާވެސް ފެން ފޮދަކާ ނުލާ ދިރުވާލީ ކަމަށް ވިދާޅުވެ ރައީސް ޔާމީން ނުރުހުން ފާޅުކުރެއްވިއެވެ.

ރައީސް ޔާމީން ވިދާޅުވީ، ރާއްޖޭގެ އިގްތިސޯދީ ހާލަތާ ސަރުކާރުގެ އަމަލުތައް ބޭރުގެ ގައުމުތަކުން ނުހަނު ކައިރިން ބަލަމުން ގެންދާކަމަށެވެ. އެހެންކަމުން އިގްތިސޯދީ ފިޔަވަޅުތައް ހަރުދަނާ ނުކުރާ ނަމަ ރާއްޖެއަށް ބޭރުގެ އެހީ ލިބުން ދުރުކަން އެމަނިކުފާނު ފާހަގަކުރެއްވިއެވެ.

ރައީސް ޔާމީން މިފަދައިން ވިދާޅުވެފައިވާއިރު، ރާއްޖެއިން އިގްތިސޯދީ އިސްލާހީ މާލީ ފިޔަވަޅުތައް އަވަސް ނުކޮށްފި ނަމަ ރާއްޖެ ބަނގުރޫޓުވުމުގެ ބިރު އެބައޮތް ކަމަށް ދުނިޔޭގެ މާލީ އިދާރާތަކުން އިންޒާރުދީފައިވެއެވެ. އަދި ރާއްޖޭގެ ރޭޓިންގް ވެސް އެ އިދާރާތަކުން އެއް އަަހަރުގެ ތެރޭގައި ދެ ފަހަރެއްގެ މަތިން ދަށްކޮށްފައިވެއެވެ.