ދަރަންޏަށް ފޫޅު ކަނޑާފައި، ސަރުކާރު ނުހިންގެނީއާ ބުނާކަށް ޖާގައެއް ނެތް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފުން ބޭއްވި ޖަލްސާއެއްގައި ރައީސް ޔާމީން ވަނީ މަޖިލީހުގެ ނައިބު ރައީސުން ފެށިގެންވެސް ސަރުކާރަށް ކުރިމަތިވެފައި އޮތް ދަރަނީގެ ވާހަކަ ދައްކަވަމުން ގެންދަވާކަން ފާހަގަކުރައްވާފައެވެ. އެމަނިކުފާނު ވިދާޅުވީ އެމްޑީޕީ ސަރުކާރުގައި ދަރަނި އިންތިހާއަށް އުފެއްދިކަމާ ފައިސާވެސް ޗާޕުކުރިކަމަށް އެމަނިކުފާނުވެސް ގަބޫލުފުޅު ކުރައްވާ ކަމަށާ ނަމަވެސް އެމްޑީޕީ ސަރުކާރުން 5 އަހަރު ތެރޭގައި 160 ބިލިއަން ރުފިޔާގެ ދަރަންޏެއް އުފައްދާފައި އޮތް އިރު މި ސަރުކާރުން އެންމެ 15 މަސް ތެރޭގައި 130 ބިލިއަން ރުފިޔާގެ ބޮޑު ދަރަންޏެއް އުފައްދާ ބޭކާރު ޚަރަދުތައް ކުރުން ބަލައި ނުގަނެވޭނެ ކަމަށެވެ.

މި ސަރުކާރުން ކުރީގެ ސަރުކާރުގެ ޚަރަދުތަކުގެ ވާހަކަ ދައްކާއިރު މި ސަރުކާރުން ވެސް ގެންދަނީ ސިޔާސީ މަގާމުތަކަށް ގނަ އަދަދަކަށް މީހުން އައްޔަންކުރުން ފަދަ ބޭކާރު ގިނަ ޚަރަދު ކުރަމުން ކަމަށާ އަދި ދައުލަތު ހިންގުމުގެ ޚަރަދު ކުޑަކޮށް އިސްލާހީ އިގްތިސޯދީ ފިޔަވަޅު އަޅަން ދުނިޔޭގެ މާލީ އިދާރާތަކުން ދޭ ލަފަޔަށް ސަރުކާރުން ބޯ ނުލަނބާކަން ވެސް އެމަނިކުފާނު ފާހަގަކުރެއްވިއެވެ.

އެމަނިކުފާނު ވިދާޅުވީ ދުނިޔޭގެ ގައުމުތަކުން ދަނީ ރާއްޖެއިން ގައުމުގެ އިގްތިސޯދާ މެދު އަޅަމުންދާ ފިޔަވަޅުތައް ކައިރިން ބަލަމުން ކަމަށާ އޭގެ ތެރޭގައި ރާއްޖެއަށް ގިނަ ލީނުތަކެއް ދޫކޮށްފައިވާ ޗައިނާއާ އިންޑިއާ ވެސް ހިމެނޭ ކަން އެމަނިކުފާނު ފާހަގަކުރެއްވިއެވެ.