

އެމެރިކާގެ ޑިއޭގޯ ގާސިއާ އިން އިރާނަށް ހަމަލާއެއް ފޮނުވުމުގެ ކުރިން އެ މަރުކަޒަށް ހަމަލާ ދިނުމަށް އިރާނުގެ ސިފައިން ގޮވާލައިފިއެވެ.
ރާއްޖެ ކައިރި އޮތް ޑިއޭގޯ ގާސިއާ އަކީ އިނގިރޭސިވިލާތާއި އެމެރިކާގެ ޖޮއިންޓް ބޭސްއެކެވެ. އަދި އެއީ އިނގިރޭސިންގެ މިލްކުވެރިކަމުގައިވާ އިންޑިއާ ކަނޑުގެ ސަރަހައްދެކެވެ.
އެގޮތުން ރާއްޖެ އާއި ޑިއޭގޯ ގާސިއާގެ ދެމެދުގައި ހުންނަނީ 1,171.47 ކިލޯމީޓަރެވެ.
ތެހެރާނުގައި ހުންނަ އިރާނުގެ އޮފިޝަލެއް ދަ ޓެލެގްރާފް އަށް ވިދާޅުވީ ޓްރަމްޕްގެ އިންޒާރުތައް އިތުރަށް ސީރިއަސްވެއްޖެ ނަމަ އެ ރަށަށް ޕްރީއެމްޕްޓިވް ސްޓްރައިކްތައް ދިނުމަށް މަތީ ކޮމާންޑަރުން އިލްތިމާސް ކުރާ ކަމަށް ވިދާޅުވެފައިވެއެވެ.
ސެޓެލައިޓް ފޮޓޯތަކުން ދައްކާ ގޮތުގައި މިދިޔަ ހަފްތާގައި އެމެރިކާ-ޔޫކޭގެ ސްޓްރެޓެޖިކް އައުޓްޕޯސްޓަށް މަދުވެގެން ތިން ބީ-2 ސްޕިރިޓް ޖެޓް އައިސްފައިވެ އެވެ.
“ގޯސްޓްސް އޮފް ދަ ސްކައި” ގެ ނަމުން ނަންދެވިފައިވާ މި ބީ-2 ބޮން އަޅާ ބޯޓުތަކަކީ އެންމެ ކުރިއަރާފައިވާ ވައިގެ ދިފާއީ ނިޒާމުތަކުގެ ތެރެއިން ގޮސް ބޮން އެޅޭނެހެން އުފައްދާފައިވާ ބޯޓެކެވެ.
މި ބޭސް އިން ބީ-1 ލަންސަރ، ބީ-2 ސްޕިރިޓް، އަދި ބީ-52 ސްޓްރެޓޯ ފޯޓްރެސް ބޮން އަޅާ ބޯޓުތަކަށް ސަޕޯޓް ކުރާތީ، އެފްރިކާ، އޭޝިއާ އަދި އޯޝޭނިއާގެ ހުރިހާ ހިސާބެއްގައި ހިންގާ އޮޕަރޭޝަންތަކަށް މިއީ މުހިންމު ބޭހެކެވެ.
އިރާނުން ޑިއޭގޯ ގާސިއާއަށް ހަމަލާއެއް ފޮނުވާލާ އިރު ދިވެހިރާއްޖޭގެ ތެރެއިން އެ މިސައިލްތައް ދަތުރު ކުރުމުގެ ބިރު ބޮޑެވެ.