އިންޓަނޭޝަނަލް މަނިޓަރީ ފަންޑު އައިއެމްއެފުން ހަރަދު ކުޑަ ކުރުމަށް ކެނޑި ނޭޅި ރާއްޖެއަށް ގޮވާލަމުން ދަނިކޮށް ރައީސް ޑރ. މުހައްމަދު މުއިއްޒު، އިނގިރޭސިވިލާތުގެ ލިވަޕޫލް ސިޓީއަށް ރޭ ފުރާވަޑައިގެންފި އެވެ.

ރައީސް އޮފީހުން ބުނިގޮތުގައި މިއީ ރާއްޖޭގެ ފަތުރުވެރިކަމުގެ ބްރޭންޑް ވާސިލުވާ މިންވަރު އިތުރުކޮށް ރާއްޖެއަށް ޒިޔާރަތްކުރުމަށް އިތުރު ފަތުރުވެރިންނަށް ހިތްވަރު ދިނުމުގެ ގޮތުން ތިން އަހަރާއި ހަ މަސްދުވަހަށް ކުރިއަށް ގެންދާ ބައިނަލްއަގުވާމީ ކެމްޕޭނެއްގެ ފެށުމެވެ.

މި ދަތުރުފުޅުގައި، ރައީސްގެ އަރިހުގައި ޓޫރިޒަމް އެންޑް އެންވަޔަރަންމަންޓް މިނިސްޓަރު ތޯރިގު އިބްރާހީމާއި، ސްޕޯޓްސް މިނިސްޓަރު އަބްދުالله ރަފީއުއާއި، އެމްއެމްޕީއާރްސީގެ މެނޭޖިން ޑިރެކްޓަރު އިބްރާހީމް ޝިއުރީގެ އިތުރުން ސަރުކާރުގެ ކަމާބެހޭ އިސްވެރިން ބައިވެރިވެވަޑައިގަންނަވާ ކަމަށް އެ އޮފީހުން މައުލޫމާތުދެ އެވެ.

އިނގިރޭސިވިލާތަށް ކުރައްވާ މި ދަތުރުފުޅު ނިންމަވާލެއްވުމަށްފަހު، ރައީސް މާލެ ވަޑައިގަތުމަށް ހަމަޖެހިފައިވަނީ އަންނަ ހޮނިހިރު ދުވަހެވެ.

ރައީސް ޑރ. މުއިއްޒުގެ ސަރުކާރުގެ ވެރިން ހަރަދު ބޮޑު މިފަދަ ނަތީޖާއެއް ނުނެރެވޭ ދަތުރު ތަކުގައި އުޅުއްވާއިރު، ރާއްޖޭގެ ދަރަނި ބޮޑުވެ ބޭރު ފައިސާގެ ރިޒާވަށް ބާރުބޮޑުވާކަން ފާހަގަކޮށް ވީހާ ވެސް އަވަހަށް ނިޒާމީ ބަދަލުތައް ގެނެސް ސަރުކާރުގެ ހަރަދު ކުޑަކުރަން ޖެހޭކަން އައިއެމްއެފުން ވަނީ ބުނެފަ އެވެ.

މީރާގެ ހިސާބުތަކުން ދައްކާ ގޮތުން 2025 ވަނަ އަހަރުގެ ފެބްރުއަރީ ނިމުނުއިރު ދައުލަތަށް ލިބުނު އާމްދަނީ ވަނީ 2024 ވަނަ އަހަރުގެ މިމުއްދަތާ އަޅާބަލާއިރު ޖުމްލަ 480 މިލިއަން ރުފިޔާ ދަށްވެފައެވެ. ހަމަ މިއާއެކު މި މުއްދަތުގައި ލިބުނު އިންކަމް ޓެކްސް ވަނީ 17.28 ޕަސެންޓު ދަށްވެފަ އެވެ.

މިހިނގާ މާރިޗު މަހުގެ 6 ވަނަ ދުވަހު ފިނޭންސް މިނިސްޓްރީ އިން ނެރުނު "ފިސްކަލް އަޕްޑޭޓް" ރިޕޯޓު ބުނާގޮތުން އަންދާޒާ ކުރިވަރަށް އާމްދަނީ ނުލިބިއޮތް އިރުމެ، މުސާރައާއި އުޖޫރައިގެ ހަރަދަށް 225 މިލިއަން ރުފިޔާ ވަނީ އިތުރުވެފަ އެވެ.

ދައުލަތުގެ ހަރަދުތައް ފޫބެއްދުމަށްޓަކައި ބޭންކު ތަކުން ނަގާފައިވާ ދަރަނީގެ މިންވަރު އިތުރުވުމުގެ ސަބަބުން ގައުމުގެ އިގުތިސާދަށް ހުރި ނުރައްކާތެރި ކަމުގެ ވާހަކަ އައިއެމްއިން ރައީސް މުއިއްޒު އަށް އަޑުއިވޭ ގޮތައް ދައްކާތާ މިހާރު 16 މަސް ވެއްޖެ އެވެ.

އެމްއެމްއޭއާއި، ބޭރުގެ ފައިނޭންޝިއަލް އިންސްޓިޓިއުޝަން ތަކުން ދައްކަނީ ރާއްޖޭގެ އިގްތިޞާދު ބޮޑުތަނުން ގޯސްވެފައިވާ މަންޒަރެވެ. ނަމަވެސް ރައީސް މުއިއްޒު ބައްލަވަނީ މިރޭ ލިވަޕޫލުގެ ދަނޑުގައި އެވަޓަން އާ ދެކޮޅަށް ކުޅޭ ލީގު މެޗަށް އެމަނިކުފާނަށް ވަޑައިގަނެވޭތޯ އެވެ.