ރައީސް ޑރ. މުހައްމަދު މުއިއްޒުގެ ކޮއްކޯފުޅު ފާތިމަތު ސައުދާ ރައްޔިތުންގެ މަޖިލީހުގައި ތަމްސީލު ކުރައްވާ ނިލަންދޫ ދާއިރާގެ ފ. ނިލަންދޫގެ ނަރުދަމާގެ ނިޒާމު ފެއިލްވެ އެތައް ދުވަހެއް ވެފައިވާ މައްސަލަ ފާހަގަކޮށް އެކަމަށް ހައްލު ހޯދައިދިނުމަށް ނިލަންދޫ ރައްޔިތުން މި ސަރުކާރުގައި އެދެން ފަށައިފި އެވެ.

ނިލަންދޫއަށް އުފަން ހައިކޯޓުގެ އިންފޮމޭޝަން އޮފިސަރު އަމީން ފައިސަލް ކުރެއްވި ޕޯސްޓެއްގައި ވަނީ ނިލަންދޫގެ ނަރުދަމާ ނިޒާމު ފެއިލްވެ ރަށުގެ އެކި ތަންތަނުން ނަޖިސް އަރާތާ އެތައް ދުވަހެއް ވެފައިވާ ކަމަށާއި، މުޅި ރަށް ނަޖިިިހުން ތަޣައްޔަރު ވެފައިވާ ކަމަށް ވިދާޅުވެފަ އެވެ. އަދި އެކަން ހައްލުކޮށްދިނުމަށް ވަނީ އެދިފަ އެވެ.

ސައުދާ އަދި ރައީސް ސޯލިހް ވެސް ޓެގްކޮށް އޭނާ ވަނީ އެ ރަށުގެ މަގުގެ ހާލަތު ދައްކުވައިދޭ ފޮޓޯތަކެއް ވެސް ހިއްސާކޮށްފަ އެވެ.

ނިލަންދޫއިން ޝޯޝަލްމީޑިއާގައި ލިޔުނު އެހެން މީހަކު ބުނީ ނިލަންދޫ ދާއިރާގެ އިއްޒަތްތެރި މެމްބަރ ފާތިމަތު ސައުދާގެ މޭސްތިރިކަމިގައި ދާއިރާގައި ހުރި ބޮޑެތި މައްސަލަތައް ހައްލުނުވެ ލަސްވުމަކީ ހިތާމައެއް ކަމަށާއި ނިލަންދޫގެ ނަރުދަމާގެ މައްސަލަވެސް އަވަސް ހައްލެއް ހޯދައި ދިނުމަށް ކުއްލި މައްސަލައެއް މަޖިލީހަށް ހުށައަޅައިގެން ވިޔަސް މިކަން ކޮށްދިނުމަށް އެދޭ ކަމަށެވެ.

މި ކަމާއި ގުޅިގެން އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލްމަތީން ވިދާޅުވީ 2026ގައި ނިލަންދޫގެ ނަރުދަމާ ނިޒާމަށް ހައްލެއް ލިބޭނެ ކަމަށް ލަފާ ކުރެވޭ ކަމަށެވެ.

ނިލަންދޫގެ ނަރުދަމާ ނިޒާމު ޑިޒައިންކުރުމާއި އަމަލީ މަސައްކަތް ކުރުމަށް، އިންފްރާސްޓްރަކްޗާ މިނިސްޓްރީން އެމްޑަބްލިއުއެސްސީއާ ހަވާލުކުރީ މިދިޔަ އަހަރުގެ ނޮވެމްބަރު މަހުގެ 17ގައެވެ. އެ އެއްބަސްވުން ހެދީ، 540 ދުވަހުގެ ތެރޭގައި މަސައްކަތް ނިންމާ ގޮތަށެވެ.