އެމެރިކާއަށް އިމްޕޯޓު ކުރާ ރާއްޖޭގައި އުފައްދަ މުދަލުން 10 ޕަސެންޓުގެ ޓެރިފެއް ނަގަން ހަމަޖެހިފައިވާކަން އެ ގައުމުގެ ރައީސް ޑޮނާލްޑް ޓްރަމްޕް އިއުލާނު ކުރައްވައިފި އެވެ.
ވައިޓް ހައުސްއިން ވަނީ ގައުމުތަކުން އެތެރެކުރާ މުދަލުން ނަގާނެ އާ ޓެރިފް ރޭޓުތައް އިއްޔެ އިއުލާނުކޮށްފަ އެވެ. އެގޮތުން އަންނަ ހޮނިހިރު ދުވަހުން ފެށިގެން ރާއްޖެއިން އެތެރެކުރާ މުދަލަށް 10 ޕަސެންޓުގެ ޓެރިފެއް ދައްކަންޖެހޭނެ އެވެ.
އާންމު ގޮތެއްގައި ރާއްޖެއިން އެމެރިކާއަށް އެތެރެކުރަނީ ރާއްޖޭގައި އުފައްދާ މަހުގެ ބާވަތްތަކެވެ. އެމެރިކާގެ ސަރުކާރުން ހާމަކޮށްފައިވާ ތަފާސްހިސާބުތަކަށް ބަލާއިރު އެ ގައުމަށް ރާއްޖެއިން 17 މިލިއަން ޑޮލަރުގެ މުދާ 2022 ގައި އިމްޕޯޓުކުރި އެވެ.
މިއީ އެމެރިކާއިން ގައުމުތަކަށް އެތެރެ ކުރާ މުދަލުން ނަގާ ޓެރިފާއި ޑިއުޓީ ފަދަ ޓެކްސްތަކަށް ރައްދު ދިނުމުގެ ގޮތުން ނިންމެވު ނިންމެވުމެއް ކަމަށް ވަނީ ޓްރަމްޕް ވިދާޅުވެފަ އެވެ.
