ރައީސް ޑރ މުހައްމަދު މުއިއްޒު ގެންދަވަނީ ރާއްޖޭގެ އަދުލު އިންސާފުގެ ދާއިރާއަށް އެމަނިކުފާނުގެ ނުފޫޒު ފޯރުވަމުން ކަމަށާ އެހެންކަމުން ރާއްޖެއަށް އިންވެސްޓުކުރާނެ ބަޔަކުވެސް ނުވާނެ ކަމަށް ވިދާޅުވެ ޕީޕަލްސް ނޭޝަނަލް ފްރޮންޓު (ޕީއެންއެފް)ގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ކަންބޮޑުވުން ފާޅުކުރައްވައިފިއެވެ.

ޕީއެންއެފުން ބޭއްވި ޖަލްސާއެއްގައި ރާއްޖޭގެ އިގްތިސޯދީ ހާލަތު މިހާރު ހުރި މިސްރާބަށް ނަޒަރު ހިންގަވާ ލައްވާ މަލީހު ވަނީ ކަންބޮޑުވުން ފާޅުކުރައްވާފައެވެ.

މަލީހު ވިދާޅުވީ، ރައީސް މުއިއްޒު ހުރިހާކަމެއް ގައި ވެސް ދަނީ މަކަރު ހަދަމުން ކަމަށާ އެގޮތުން މަޖިލިސް ނައިބު ރައީސް އަހުމަދު ނާޒިމުއާ ދެ ބޭފުޅުންވެސް ގެންދަވަނީ ރައްޔިތުންގެ ފައިސާއަށް ޚިޔާނާތްތެރިވަމުން ކަމަށެވެ. އެގޮތުން ނާޒިމު އަކީވެސް ހުކުމެއް އޭނާގެ މައްޗަށް އޮތް މީހެއް ކަމަށާ އަލުން މައްސަލަ ބަލަން ތަހްވީލުކުރުމުން ބަލަން ޖެހެނީ ވަކި މައްސަލަތަކެއް ތޯ އައްސަވާ ވެސް މަލީހު ވަނީ ސުވާލުއުފައްދަވާފައެވެ. އަދި މަލީހު ވަނީ އިންސާފުގެ ތަރާދުން މިނައިފިނަމަ ނާޒިމުއަށް މަޖިލިސް ގޮނޑީގައިވެސް ނީނދެވޭނެ ކަމަށް ވިދާޅުވެފައެވެ.

މަލީހު ވިދާޅުވީ ފެނި ހާމައަށް އޮތް މިންވަރަށް ރައީސް މުއިއްޒު އަދުލުގެ ނިޒާމަށް ވެސް ނުފޫޒު ފޯރުވަމުންދާކަން ބޭރު ގައުމުތަކުގެ އިންވެސްޓަރުންނަށް ވެސް އެނގޭ ކަމަށާ އެހެންކަމުން ރާއްޖެއަށް އިންވެސްޓު ކުރާނެ ބަޔަކު ނުވާނެ ކަމަށް ވެސް މަލީހު ވަނީ ވިދާޅުވެފައެވެ.

މަލީހު ވިދާޅުވީ ރާއްޖޭގެ އިގްތިސޯދާ ގުޅިގެން ފެހި ސިގްނަލް ލިބިފައި ހުރި ކަމަށް ރައީސް ޑރ މުހައްމަދު މުއިއްޒު ވިދާޅުވެފައިވީ ނަމަވެސް ދުނިޔޭގެ މާލީ އިދާރާތަކުންނާ ރާއްޖޭގެ އިގްތިސޯދީ މާހިރުންނާ، ރާއްޖޭގެ މިނިސްޓްރީތަކުގެ އެތެރޭގެ ތިއްބެވި ބޭބޭފުޅުންގެ އަމަލުން ފެންނަނީ ރާއްޖޭގެ އިގްތިސޯދު މިއިން ޒަމާނަކުވެސް ނުވެެއްޓޭ ވަރުގެ އަނދަވަޅަކަށް ވެއްޓިފައިވާ މަންޒަރު ކަމަށެވެ.

މަލީހު ވިދާޅުވީ، ސަރުކާރާ ގުޅިގެން އުފާވެރި ހިނިތުންވުމާ އެކު ގައުމުގެ ހާލަތު އޮތް މިންވަރުން ވާހަކަ ދެއްކެން ނެތް ކަމަށެވެ.

މަލީހު ވިދާޅުވީ، ގައުމުގެ ކަންކަމާ ގުޅިގެން ނުހަނު ކަންބޮޑުވުން އެބަ ހުރި ކަމަށާ ނަމަވެސް މިއިން ކަމެއް ރަގަޅުކޮށް ހައްލުކުރަން ސަރުކާރުން މަސައްކަތްކުރާ މަންޒަރު ނުފެންނަ ކަމަށެވެ.