

އުމްރާވެރިންނާއި އީދު ޗުއްޓީ ނިންމާފައި އަންނަ މީހުންނާއި އަނބުރާ ރަށަށް ދާ މީހުންނާއެކީ ވެލާނާ އެއާޕޯޓަށް ބާރު ބޮޑުވާނެތީ، އެއާޕޯޓަށް ދާ މީހުންނާއި ވެހިކަލްތަކުން ސަމާލުވާން އެމްއޭސީއެލް އާއި ފުލުހުން އަންގައިފި އެވެ.
އެމްއޭސީއެލްއިން ބުނީ ރާއްޖެއިން އުމްރާއަށް ދިޔަ ފަރާތްތައް ހުކުރު ދުވަހު މެންދުރުފަހުން ފެށިގެން ރާއްޖެ އެނބުރި އައުމަށް ހަމަޖެހިފައިވާތީ، ޕެސެންޖާ ޓްރެފިކް އިތުރުވާނެ ކަމަށް ލަފާކުރެވޭ ކަމަށެވެ.
އެއާއެކު ސޯޝަލް މީޑިއާގައި މިރޭ ފުލުހުން ކުރި ޕޯސްޓެއްގައިވަނީ، މާދަމާއާއި ހޮނިހިރު ދުވަހު އެއާޕޯޓަށް ޒިޔާރަތްކުރާ ފަރާތްތައް އިތުރުވެ، ޓްރެފިކަށް ބާރުބޮޑުވާނެ ކަމަށް ލަފާކުރެވޭތީ، މި ދެ ދުވަހު އެއާޕޯޓަށް ދަތުރުކުރާ އެއްގަމު އުޅަނދު ދުއްވާ މީހުން ފުލުހުން ދޭ އިރުޝާދުތަކާ އެއްގޮތަށް އަމަލު ކުރުމަށް އެދޭ ކަމަށެވެ.
އަދި މި ފަދަ ކަންކަމުގައި އާންމުންގެ ފަރާތުން ދޭ އެއްބާރުލުމަށް ވަނީ ޝުކުރު އަދާކޮށްފަ އެވެ.
އެއާޕޯޓު އެންމެ ބާރު ބޮޑު ވާނެ ކަމަށް ލަފާކުރާ ގަޑިތައް
ހުކުރު ދުވަހު - މެންދުރު 2 އިން ފެށިގެން ހަވީރު 6 އާ ދޭތެރޭގައި
ހޮނިހިރު ދުވަހު - ހަވީރު 4 އިން ފެށިގެން ހަވީރު 6 އާ ދޭތެރޭގައި
ހޯމަ ދުވަހު - މެންދުރު 2 އިން ފެށިގެން ހަވީރު 4:30 އާ ދޭތެރޭގައި