

ރޭ ދަންވަރު އަލިފާން ރޯވެ، އަނދައި އަޑިއަށް ދިޔަ 'ހޮޅުދޫ ބޯޓު"ން ގެއްލުނު ޒުވާނާ ހޯދަން ކަނޑު މަގުންނާއި ވައިގެ މަގުން ބޮޑު ސަރަހައްދެއް ބަލައިފި އެވެ.
އެމްއެމްޑީއެފުން ބުނީ މުޝްފިގު ހޯދުމުގެ މަސައްކަތުގައި ކަނޑާއި ވައިގެމަގުން އަދި ޑައިވަރުން ވެސް ހަރަކާތްތެރިވަމުންދާ ކަމަށެވެ.
އެމްއެންޑީއެފުން އިތުރަށް ބުނީ މުޝްފިގު ހޯދުމަށް ސާފް ސާޗުގެ ގޮތުގައި 53.04 ސްކުއެއާ ނޯޓިކަލް މޭލް ބަލާފައިވާ ކަމަށެވެ. އަދި ކަނޑުއަޑިއަށް ޑައިވްކޮށްގެން 64،240 އަކަމީޓަރު، އަދި ވައިގެ މަގުން 4000 އަކަމީޓަރު ބަލާފައިވާ ކަމަށެވެ.
އެހެން ނަމަވެސް އަދި މިހާތަނަށް އޭނާ ފެނިފައެއް ނުވެ އެވެ.
ކަނޑޫދޫ ކައިރިން ބޯޓުގައި އަލިފާން ރޯވެ އަނދައި ހުލިވީ މާލެ ދަތުރުކުރަނިކޮށެވެ. ރޯވި ސަބަބެއް އަދި ނޭނގެ އެވެ. އެމްއެންޑީއެފުން މިއަދު މީޑިއާތަކަށް ފޮނުވި މެސެޖެއްގައި ބުނީ "ހޮޅުދޫ ބޯޓު" ރޭ ދަންވަރު 2:07 އެހާކަންހާއިރު އެ ސަރަހައްދަށް އަޑިއަށް ގޮސްފައިވާ ކަމަށެވެ.
މި ބޯޓުން 18 މީހަކު ދަތުރުކުރިއިރު އޭގެތެރެއިން 17 މީހަކު ވަނީ ސަލާމަތްކޮށްފަ އެވެ.