ސަސްޕެންޑްކޮށްފައިވާ ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރަށް ދައުލަތުގެ އިސްވެރިން ނުފޫޒު ފޯރުވަން މަސައްކަތް ކުރި މައްސަލައިގައި ޖިނާއީ ތަހުގީގެއް ކޮށްދިނުމަށް އެދި ފުލުހަށް މައްސަލަ ހުށަހަޅާފިއެވެ.

އެގޮތުން ފުލުހަށް މައްސަލަ ހުށަހަޅައިފައިވަނީ މިއަދުކަން ފާހަގަކޮށްލެވެއެވެ.

މީގެ އިތުރުން އެންޓި ކޮރަޕްޝަން ކޮމިޝަން އޭސީސީން އަޒްމިރަލްދާގެ މައްޗަށް ޖިނާއީ ތަހުގީގެއް ހިންގަމުންދާ ކަމަށް ބުނެ އެ ކޮމިޝަނުގެ ރައީސް އާދަމް ޝާމިލް، ޖުޑީޝަލް ސާވިސް ކޮމިޝަން ޖޭއެސްސީން ދޮގު މައުލޫމާތު ދިން ކަމަށް ބުނެ އެކަމަނާގެ ފަރާތުން ފުލުހަށްވަނީ އެ މައްސަލަ ހުށަހަޅައިފައިވެއެވެ.

އަޒްމިރަލްދާގެ މައްޗަށް ތުހުމަތުކުރެވޭ މައްސަލައަކީ ކޮބައި ކަމެއް މިހާތަނަށް އޭސީސީ އާއި ޖޭއެސްސީއަކަށް ބުނެ ނުދެވެއެވެ. އަދި އޭސީސީން އަދަދު ނޫހުން އާރުޓީއައިއެއް ހުށަހެޅުމުން ވެސް އެ މައްސަލައިގެ އެއްވެސް ތަފުސީލެއް ހާމަކުރަން ދެކޮޅު ހެދިކަންވެސްވަނީ ހާމަވެފައެވެ.

އަޒްމިރަލްދާ އާއި ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރުގެ މައްޗަށް އޭސީސީން ތަހުގީގު ހިންގަނީ އަޒްމިރަލްދާގެ ފިރިކަލުން އިސްމާއީލް ލަތީފްގެ ބަންދު އަމުރަކަށް ނުފޫޒު ފޯރުވި ކަމަށް ބުނާ މައްސަލަ އެވެ. ނަމަވެސް ކޮމިޝަނުން އެ މައްސަލަ އަކީ ބަލާ މައްސަލައެއްކަން ހާމަވެސް ނުކުރާކަން ފާހަގަކޮށްލެވެއެވެ.