ރާއްޖޭގައި ރަޖިސްޓްރީ ނުކޮށް ހިންގާ މީޑިއާތަކުގެ މައްސަލަތައް ބެލޭނެ ހަރުދަނާ ނިޒާމެއް އެކުލަވާލުމަށް ކަމާ ގުޅޭ އުސޫލެއް ހަދަން މޯލްޑިވްސް މީޑިއާ ކައުންސިލުން ނިންމައިފިއެވެ.
މީޑިއާ ކައުންސިލުން ނެރުނު ބަޔާނެއްގައި ބުނެފައިވަނީ "ކުރުސި.ކޮމް" އާއި "ދިޔަވަރު.ކޮމް" އާއި "ދޮންއަމާ.ކޮމް" ނަމުގައި ހިންގާ ތިން ވެބްސައިޓުން ރައްޔިތުންނަށް ހަގީގަތް އޮޅޭ ގޮތަށް ދޮގު މައުލޫމާތު ފަތުރަމުން އަންނަ ކަމަށް ބުނެ ގިނަ އަދަދެއްގެ ޝަކުވާ ކައުންސިލަށް ލިބެމުންދާ ކަމަށެވެ.
އެ ޝަކުވާ ލިބިގެން އެ ވެބްސައިޓުތައް ބެލިއިރު ހަގީގަތާ ހިލާފު މައުލޫމާތު ހުރިކަން ފާހަގަކުރެވޭ ކަމަށާއި އެ މައްސަލަތައް ބަލަމުން އަންނަ ވަރަކަށް އެކަމުގައި ކައުންސިލުގެ ނިންމުންތައް ހާމަކުރާނެ ކަމަށް މީޑިއާ ކައުންސިލްގެ ބަޔާނުގައިވަނީ ބުނެފައެވެ.
އެހެންވެ ކައުންސިލުން ވަނީ ރަޖިސްޓްރީނުކޮށް ހިންގާ މީޑިއާތަކުގެ މައްސަލަތައް ބެލޭނެ ހަރުދަނާ ނިޒާމެއް އެކުލަވާލުމަށްޓަކައި ކަމާ ގުޅޭ އުސޫލެއް ހަދަން ނިންމައިފައެވެ.
ދޮގު މައުލޫމާތު ފަތުރާ ކަމަށް ބުނެ މީގެކުރިން ކުރުސީ އާއި ދިޔަވަރު ވެބްސައިޓް ސަރުކާރުން ބްލޮކް ކުރުމުން މީޑިޔާ ކައުންސިލުން ވެސް ވަނީ ބަޔާން ނެރެ ރެޖިސްޓްރީ ނުކުރި ނަމަވެސް ބްލޮކްކުރެވިގެން ނުވާނެކަމަށް ބުނެފައެވެ.
