މާލޭ ސިޓީގެ މޭޔަރު ކަމަށް ވާދަކުރައްވާ ކެންޑިޑޭޓުންގެ ތެރެއިން ކުރީގެ ކޮމިޝަނާ އޮފް ޕޮލިސް ހުސެއިން ވަހީދް ނޫނީ ނަޒާހަތްތެރި ބޭފުޅަކު ނެތް ކަމަށް ރައްޔިތުންގެ މަޖިލީހުގެ އިންތިހާބުގައި ހެންވޭރު ހުޅަނގު ދާއިރާއަށް ރައީސް އަބްދުﷲ ޔާމީންގެ ތާއީދާ އެކު ވާދަކުރައްވާ ނާއިފް ޝައުކަތް ވިދާޅުވެއްޖެއެވެ.
ނާއިފް މިފަދައިން ވިދާޅުވެފައިވަނީ އާދިއްތަ ދުވަހުގެ ރޭ ޕީއެންއެފުން ބޭއްވި ޖަގަހަ ޖަލްސާގައި ވާހަކަދައްކަވަމުންނެވެ.
ނާއިފް ވިދާޅުވީ ސީޕީ ހުސެއިން ފިޔަވާ މޭޔަރު ކަމަށް ވާދަކުރައްވާ ކެނޑިޑޭޓުންގެ ތެރޭގައި ނަޒާހަތްތެރިކަމާ އަމާނާތްތެރިކަން ހުރި ބޭފުޅެއް ނެތް ކަމަށެވެ.
މިއަދު މޭޔަރު ކަމަށް ކުރި މަތި ލައްވާފަ ހުރި ކެންޑިޑޭޓުންގެ ތެރޭގައި އަޅުގަނޑުމެންގެ ސީޕީ ނޫނީ އިންޓާގްރިޓީ ހުރި ބޭފުޅެއް ނެތޭ
ނާއިފް ޝައުކަތް
ނާއިފް ވިދާޅުވީ ބައި އިލެކްޝަންއަށް ފަހު ބާކި އޮތީ ގާތްކަޑަކަށް 2 އަހަރާ 3 މަސް ކަމަށާއި، މޭޔަރުކަމަށް ޖުމްލަ ގޮތުގައި ލިބޭ މުސާރައިންވެސް ސަރުކާރުގެ ކެންޑިޑޭޓުގެ ގޮތުގައި ވާދަކުރައްވާ އާޒިމާ ޝަކޫރަކަށް ދަރަނި އަދާކޮށް ނުނިމޭނެ ކަމަށެވެ.
މީގެ އިތުރުން ނާއިފް ވަނީ ހުރިހާ ރައްޔިތުންނަށް ސީޕީ ހުސެއިން ވަހީދާއި ދެން ދިބި 3 ކެންޑިޑޭޓުންނަށް ވޯޓު ދެއްވުމަށް ގޮވާލާފައެވެ.
