"ވާނުވާ އުވާލާ" ގެ ނަމުގައި ވާނުވާ ބަންދުތަކާއި ދެކޮޅަށް ކުރިއަށް ގެންދިއުމަށް ތައްޔާރުކޮށްފައިވާ އިވެންޓް ފުލުހުންގެ ހިދުމަތުން މަޖުބޫރުކުރުމުން ކެންސަލްކޮށްފިއެވެ.

މި އިވެންޓް ބާއްވަން ހަމަ ޖެއްސީ ހުކުރު ދުވަހުގެ ހަވީރުގައެވެ.

ނަމަވެސް މޯލްޑިވްސް ހިއުމަން ރައިޓްސް އެންޑް ޑިޓެއިނީ ވޮޗް (އެމްއެޗްއާރުޑީޑަބްލިއު) އިން ނެރެފައިވާ ބަޔާނެއްގައި ވާ ގޮތުން އެ އިވެންޓް ކެންސަލްކުރަން ޖެހިފައިވަނީ، ދިވެހި ފުލުހުންގެ ހިދުމަތުން އެކަން ހުއްޓާލުމަށް އަންގާފައިވުމާއި ގުޅިގެންނެވެ.

މީގެ އިތުރުން އެ ބަޔާނުގައި ވަނީ، އެ އިވެންޓް ކުރިއަސް ގެންދިއުމަށްހަމަ ޖައްސާފައިވަނީ، ބޭނުންވާ ސަރަހައްދުގެ ހުއްދަ ސިޓީ ކައުންސިލުން ހޯދައި، އިވެންޓުގަ އިންތިޒާމުތައް ފުލުހުންގެ ހިދުމަތުގެ އެއްބާރުލުމާއެކު ކުރިއަށް ގެންދިއުމަށް، އެ އިދާރާއާއެކު ބައްދަލުވުން ބާއްވާ، ފުލުހުންގެ އިދާރާއިން އެ އިވެންޓު ބޭއްވުމަށް ފުރިހަމަ އެއްބާރުލުން ދެއްވާނެ ކަމުގެ ޔަގީންކަން ދިނުމުން ކަމަށެވެ.

ނަމަވެސް ބުރާސްފަތި ދުވަހުގެ ރޭގެ ވަގުތެއްގައި ފުލުހުންގެ އިދާރާއިން ވަނީ ލިޔުމަކުން އެކަން ހުއްޓާލުމަށް އަންގާފައި ކަމަށް އެބަޔާނުގައި ހާމަކޮށްފައިވެއެވެ.

އިތުރަށް އެ ބަޔާނުގައި ވަނީ، ކުރެވޭ ތުހުމަތެއްގެ މައްޗަށް ޝަރީއަތަކާއި ނުލައި، އަހަރުތަަކަކަށް ބަންދުކޮށްފައި އޮންނަށް އޮތުމަށް ރާއްޖޭގެ ސިޔާސީ ޕާޓީތަކާއި، ޤާނޫނީ ފަރާތްތަކާއި އަދިވެސް ހައްޤުތަކާއި ގުޅިގެން ވަކާލަތުކުރާ ފަރާތްތަކުން ކެނޑިނޭޅި އަޑު އުފުލަމުންދާ މި ދަނޑިވަޅުގައި މިކަމަށް ސަރުކާރުން ހައްލެއް ހޯދައި ދިނުމަސް މަސައްކަތެއް ނުކުރާއިރު އޭގެ ބަދަލުގައި އަނިޔާވެރިކަންކަން ހުއްޓުވަން މަސައްަކަތް ކޯށް އަޑު އުފުލާ މީހުންނާއި ހަރަކާތްތަކަށް ފުލުހުން ހުއްޓުވުމަކީ އެ ޖަމިއްޔާއިން ކަންބޮޑުވާކަމެއް ކަމަށެވެ.

އަދި އެއީ ސުލްހަވެރިކަމާއެކު ހިޔާލުފާޅުކުރުމުގެ މިިވަންކަމަަށް އެޅޭ ހުރަހެއް ކަމަށް ވެސް އެ ޖަމިއްޔާއިން ދެކޭ ކަމަށް ފާހަގަކުރައްވާފައިވެއެވެ.

އެ ޖަމިއްޔާއިން ފުލުހުންގެ އެންގުމަށްފަހު އެ އެއްވުން ނުބާއްވަން ނިންމާފައިވަނިކޮށްވެސް ރަސްފަންނުގައި ބަޔަކު ވަނީ ނުކުމެ ވާނުވާ ބަންދާއި ގުޅިގެން އަޑުއުފުލާފައެވެ. އަދި އެސަރަހައްދުގައި ފުލުހުން ވެސް ހަރަކާތްތެރިވެފައިވާކަމަށް މައުލޫމާތުލިބިފައިވެއެވެ.