ނިމިދިޔަ ސަރުކާރުން ފެށި "ގެދޮރުވެރިޔާ" ސްކީމުގެ ދަށުން ފުރަތަމަ ދޫކުރަން ހަމަޖެހިފައިވާ 4،000 ފުލެޓަށް މާކްސް ދީފައިވާ ގޮތް ވީހާވެސް އަވަހަށް ތަހުގީގުކޮށް ނިންމުމުގެ މަސައްކަތް ކުރަމުން އަންނަކަމަށް އެންޓި ކޮރަޕްޝަންސް ކޮމިޝަން- އޭސީސީއިން ބުެނެފިއެވެ.

މި މައްސަލަ ބެލުމުގައި މިހާރު ކުރިއަށް ދަނީ މައްސަލައާއި ގުޅުން ހުރި ފަރާތްތަށް އެ ކޮމިޝަނަށް ހާޒިރުކޮށް އެ ފަރާތްތަކުގެ ބަޔާން ނެގުމުގެ މަސައްކަތް ކަމަށެވެ. އަދި މި މައްސަލަ ބެލުމަށް ހަމަޖެހިފައިވާ ޓީމުން އަންނަނީ ވީ އެންމެ އަވަހަށް މި މައްސަލަ ނިންމުމުގެ މަސައްކަތް ކުރަމުން ކަމަށްވެސް އެ ކޮމިޝަނުން ވަނީ ބުނެފައިއެވެ.

ފްލެޓުތަކުގެ މައްސަލައިގައި މިނިވަން މުވައްސަސާތަކާއި ބެހޭ ކޮމިޓީއަށް އެ ކޮމިޝަން ހާޒިރުކޮށް ސުވާލުކުރުުމުން އޭސީސީއިން ވަނީ ގެދޮރުވެރިޔާ ޕޯޓަލް ބަލާ ފާސް ކުރި އިރު، ޝަރުތު ހަމަނުވާ މީހުންނަށް ޕޮއިންޓު ދީފައިވާކަން ފާހަގަކޮށްފައިއެވެ. އަދި ޕޮއިންޓު ހަމަނުވާ މީހުންނަށް އެ ޕޯޓަލް މެދުވެރިކޮށް ޕޮއިންޓު ދީފައިވާކަންވެސް އެ ކޮމިޝަނުން ވަނީ ހާމަކޮށްފައިއެވެ.

ގެދޮރުވެރިޔާ ޕޯޓަލް މެދުވެރިކޮށް ބޭނުންވާ ހުރިހާ ލިޔެކިޔުންތަކެއް އަޕްލޯޑު ކުރުމުން އެ ޕޯޓަލްއިން އެމީހަކަށް ލޮބޭ ޕޮއިންޓުގެ އަދަދު އޮޓޯއިން ޖެނެރޭޓުކުރެއެވެ.

ނަމަވެސް އެ ޕޯޓަލްއިން ޖެނެރޭޓުކޮށްފައިވާ ޕޮއިންޓުތަށް އެޕްރޫވުކުރި އިރު ޕޮއިންޓު އުނި އިތުރުކޮށްފައިވާކަމަށް އޭސީސީއިން ވަނީ ކޮމިޓީ ބައްދަލުވުމުގައި ހާމަކޮށްފައިއެވެ.

އަދި މާލޭގައި ނޫޅޭ ބައެއް މީހުންނަށްވެސް ޕޯޓަލް މެދުވެރިކޮށް ފްލެޓު ދީފައިވާކަމަށް އޭސީސީއިން ވަނީ ބުނެފައިއެވެ.