ރާއްޖެއަށް ދިމާވެފައި އޮތް ޑޮލަރުގެ މައްސަލަ އިންތިހާއަށް ގޯސްވެފައިވާއިރު އެކަން ހައްލުކުރަން އެކަށޭނެ ފިޔަވަޅުތަކެއް ނޭޅުނު މައްސަލައިގައި މަރުކަޒީ ބޭންކް (އެމްއެމްއޭ)ގެ ގަވަރުނަރު އަލީ ހާޝިމް އިސްތިއުފާ ދޭން، މޯލްޑިވިސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން ގޮވާލައިފިއެވެ.

މަޓާޓޯއިން ނެރުނު ބަޔާނެއްގައި ބުނެފައިވަނީ ލޯކަލް ވިޔަފާރިތަކަށާއި ވަކިވަކި ފަރުދުންނަށް ޑޮލަރު ލިބުން މަދުވުމުން، ރާއްޖޭގެ ހާލަތު ވަނީ ސީރިއަސް ދަރަޖަތަކަށް ގޮސް، ގައުމުގެ އިގްތިސާދުގެ ހަމަޖެހުމަށް ބޮޑު ނުރައްކަލެއް ކުރިމަތިވެފައިވާ ކަމަށެވެ.

އެ އެސޯސިއޭޝަނުން ބުނީ، ޑޮލަރުގެ މައްސަލަ ބޮޑުވެ ދިވެހި ވިޔަފާރިތަކަށް ބޭރުގެ ޑިމާންޑަށް ކޭޓާނުކުރެވިދާނެ ކަމަށެވެ.

ބަޔާނުގައި ފާހަގަކޮށްފައިވާ ގޮތުގައި ޑޮލަރުގެ މައްސަލަ އިންތިހާއަށް ގޯސްވެފައިވަނީ ބޭންކުތަކުގައި ޑޮލަރު ލިބެން ނެތުމުންނެވެ. އެހެންވެ، ބޭންކުތަކުން ފައިސާ ދޫކުރުމުގައިި ދިވެހި ވިޔަފާރިތަކަށް އިސްކަން ދޭން ވަނީ ގޮވާލައިފައެވެ. މަޓާޓޯއިން ބުނީ ދިވެހި ވިޔަފާރިތަކަށް އިސްކަންދިނުމުގެ ބަދަލުގައި ބޭންކުން ލިބޭ ޑޮލަރު ފަންޑުތަކާއި ބޮންޑުތަކަށް ޚަރަދު ކުރުމުގެ ސަބަބުން ޑޮލަރުގެ މައްސަލަ އިތުރަށް ގޯސްވެފައިވާ ކަމަށެވެ.

"މިކަން ހައްލުކުރަން ސަރުކާރުން ކުއްލި ފިޔަވަޅުތަކެއް ކޮންމެހެން އަޅަންޖެހޭ. ދިގުމުއްދަތަކަށް އިގުތިސާދީ ހަމަޖެހުމާއި ނަފާވެރިކަން ހޯދަން ހަރުދަނާ ފިސްކަލް ޕޮލިސީއެއް ކޮންމެހެން ތަންފީޒުކުރަން ޖެހޭ،" ބަޔާނުގައި ވެއެވެ.

ޑޮލަރުގެ ދަތިކަމުގެ ސަބަބުން ރާއްޖޭގެ އިގްތިސާދަށް ކުރާ ނޭދެވޭ އަސަރުތަކަށް އަލިއަޅުވާލައްވަމުން މަޓާޓޯއިން އިޝާރާތް ކުރައްވަނީ މިދިޔަ އަހަރު މަޓާޓޯއިން ރާއްޖޭގެ ޓޫރިޒަމް އެންޑް ފައިނޭންސްއާ ބެހޭ ރިޕޯޓަށެވެ. މާޓާޓޯއިން ބުނާގޮތުން ޑޮލަރުގެ ދަތިކަމުގެ ސަބަބުން ރާއްޖޭގެ އިގްތިސާދުގެ މުހިންމު ދާއިރާއެއްގެ ގޮތުގައި ދެނެގަނެ، ވިޔަފާރިތައް ފައިދާހުރި ގޮތެއްގައި ހިންގުމާއި ބައިނަލްއަގްވާމީ މާކެޓުގެ ޑިމާންޑްތައް ފުއްދުމަށް އޭގެ އަސަރު ކުރާނެއެވެ.

އަދި ހަމައެއާއެކު ލޯކަލް ބޭންކުތަކުގެ ތެރޭގައި ބޭރު ފައިސާއާއި ލިކުއިޑިޓީގެ މައްސަލަތައް މަދުވާނެ ކަމަށްވެސް އެ ބަޔާނުގައި ވަނީ ބުނެފައެވެ.

މަޓާޓޯއިން ފާހަގަކުރާ ގޮތުގައި ލޯކަލް ވިޔަފާރިތަކަށް ލޯނު ދިނުމަށް އިސްކަންދިނުމުގެ ބަދަލުގައި ބޭންކުތަކުން ފައިސާ ރީޑައިރެކްޓްކޮށްފައިވަނީ ބޮންޑަށެވެ. މިކަމުގެ ސަބަބުން މާކެޓުގައި ޑޮލަރު ލިބޭނެ ގޮތް އިތުރަށް ވަނީ ދަތިވެފައެވެ. އަދި އޭގެ ސަބަބުން އިގްތިސާދީ ކުރިއެރުމަށް ވަރަށް ބޮޑަށް ހުރަސްއެޅި، ޑޮލަރުގެ ދަތިކަން އިތުރަށް ގޯސްވެގެންދާނެ ކަމުގައި މަޓާޓޯއިން ދެކެއެވެ.

މަޓާޓޯއިން ބުނީ، މިދިޔަ ސަރުކާރުތަކުން ގެންގުޅުނު ޚަރަދު ކުރުމާއި ލޯން ނެގުމުގެ ސަގާފަތަކީ ދެމެހެއްޓެނިވި އުސޫލެއް ނޫން ކަމަށެވެ. އެ އެސޯސިއޭޝަނުން ވަނީ ޑޮލަރުގެ މައްސަލަ ހައްލުކުރަން ހަރުދަނާ އަދި ކުއްލި ފިޔަވަޅުތަކެއް އަޅަން ސަރުކާރަށް ގޮވާލައިފައެވެ.

އެގޮތުން، ދިވެހި ވިޔަފާރިތަކަށް ފައިސާ ދޫކުރުން ޕްރޮމޯޓުކޮށް ޑޮލަރުގެ ވަގު ވިޔަފާރި ހުއްޓުވަން ވަނީ ގޮވާލައިފައެވެ. އެކަން ނުކުރެވިއްޖެ ނަމަ، ޑޮލަރުގެ މައްސަލަ ހައްތަހައި ގޯސްވާނެ ކަމަށް އެ އެސޯސިއޭޝަންގެ ބަޔާނުގައި ވަނީ ބުނެފައެވެ.