މަސްވެރިންނަށް ދޭންޖެހޭ ފައިސާ ދިނުމަށް ލަސްތަކެއް ވަމުން އަންނާތީ އެމައްސަލަ ހައްލުކޮށްދިނުމަށް އެދި ގޮވާލާ ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.

އެ ގަރާރު މަޖިލީހަށް ހުށައެޅީ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމްއެވެ.

އެ ގަރާރުގައި ރޮޒައިނާ ވަނީ މަސްވެރިންނަށް ދޭނެޖެހޭ ފައިސާ ވީ އެންމެ އަވަހަކަށް ދިނުނަށް ގޮވާލާފައެވެ.

ރޮޒައިނާ ވިދާޅުވީ މިދިޔަ ޑިސެމްބަރު މަހުގެ 18 ވަނަ ދުވަހުން ފެށިގެން މިވަގުތާ ހަމައަށް މަސްވެރިންނަށް ދައްކަންޖެހޭ 298 މިލިއަން ރުފިޔާ އެބަ އޮތް ކަމަށެވެ. އެހެން ނަމަވެސް ދެމަސްދުވަސް ފާއިތުވެގެން ދިޔައިރުވެސް މަސްވެރިންނަށް ފައިސާ ލިބިފައިނުވާ ކަމަށް ގަރާރުގައި ބުނެފައިވެއެވެ.

މީގެ އިތުރުން އެ ގަރާރުގައި ވަނީ މަސްވެރިންނަށް ފައިސާ ނުދިނުމުގެ ސަބަބުން މަސްވެރިންގެ ދިރިއުޅުމުގެ ކަންކަން ދަތިވަމުންދާ ކަމުގެ ކަންބޮޑުވުން މަސްވެރިން ފާޅުކުރަމުންދާ ކަން ފާހަގަކޮށް މަސްވެރިން ބާނާ މަހަށްވާ ފައިސާ ވީ އެންމެ އަވަހަކަށް ހަވާލުކުރުމަށް ސަރުކާރަށް ގޮވާލާފައެވެ.

ރޮޒައިނާ މިހެން ވިދާޅުވި އިރު މަސްވެރިންގެ ފައިސާ ނުލިބި ލަސްވާތަކެއް ވަމުން އަންނާތީ އާދިއްތަ ދުވަހުން ފެށިގެން ކޫއްޑޫގައި އަންނަނީ މުޒާހަރާ ކުރަމުންނެވެ.