ހަމާސް އާއި ސަހްޔޫނީންގެ ދެމެދު ނުސީދާ މަޝްވަރާތައް ހޮނިހިރު ދުވަހު އަލުން ފެށީ ގަތަރުގެ ވެރިރަށް ދޯހާގައި ކަމަށް ހަމާސްގެ އިސް އޮފިޝަލް މަހްމޫދު މަރްދާވީ ވިދާޅުވެއްޖެ އެވެ.
މަރްދާވީ ވިދާޅުވީ މި މަޝްވަރާތައް ކުރިއަށް ގެންދަނީ ގަތަރާއި އެމެރިކާގެ މެދުވެރިކަމުގެ ދަށުން ޣައްޒާގައި ހަނގުރާމަ ހުއްޓާލުމާއި ރަހީނު ބަދަލުކުރުމުގެ އެއްބަސްވުމެއް ފައިނަލް ކުރުމުގެ މަސައްކަތެއް ކަމަށާއި އަދި އެއީ ޝަރުތަކާ ނުލައި ކަމަށެވެ.
ހަމާސްއާ ގާތް މީހަކު ނަން ނުޖެހުމަށް ޝަރުތުކޮށް ޝިންހުއާއަށް ބުނީ މި މަޝްވަރާތައް ބިނާވެފައިވަނީ މެދުއިރުމައްޗަށް އެމެރިކާގެ ހާއްސަ މަންދޫބު ސްޓީވް ވިޓްކޯފް ހުށަހެޅުއްވި ހުށަހެޅުމެއްގެ މައްޗަށް ކަމަށާއި އެ ހުށަހެޅުމަށް ހަމާސް އިން ވަނީ ވަރަށް ބޮޑަށް އިސްލާހު ގެނެސްފައެވެ.
މަސްދަރު ބުނި ގޮތުގައި ޣައްޒާގައި މިހާރު ކުރިއަށްދާ ހަނގުރާމަ ހުއްޓާލުމުގެ މަޝްވަރާތަކުގެ ބުރުގައި އެމެރިކާއިން ފޯރުކޮށްދިން ޔަގީން ކަންތައްތަކަކީ އެއަށްވުރެ ސީރިއަސް ގެރެންޓީތަކެއް ކަމަށާއި އޭގެ ތެރޭގައި އެއްބަސްވުމެއްގެ ޝަރުތުތައް ތަންފީޒު ކުރުމަށް ސާފު ވައުދުތަކެއް ހިމެނޭ ކަމަށެވެ.
މީގެ އިތުރުން ސަހްޔޫނީންގެ ޑިފެންސް މިނިސްޓަރު އިސްރާއީލް ކަޓްޒް ވަނީ ހަމާސްއާއެކު މަޝްވަރާތައް އަލުން ފެށޭކަން ހޮނިހިރު ދުވަހު ކަށަވަރުކޮށްދީފައެވެ.
