މިއަދުގެ ރައްޔިތުންގެ މަޖިލީހަކީ ރައީސް މުހައްމަދު މުއިއްޒު ކާންދީ އޮޅުކޮށްގެން ގެންގުޅޭ މެމްބަރުންތަކެއް ތިބި މަޖިލީހެއް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ އާދިއްތަ ދުވަހުގެ ރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ ޖުޑީޝީއަރީ ނުފޫޒު ފޯރުވާ ރައީސް މުއިއްޒު ސުޕްރީމު ކޯޓުގެ ފަނޑިޔާރުން ވަކިކުރި ކުރުމުގައި މަޖިލީހުން ގާނޫނުތަކާ ގަވާއިދުތައް ހުއްޓާ އަމަލުކޮށްފައިވަނީ ޣައިރު ގާނޫނު ގޮތްތަކަށް ކަމަށެވެ. އެގޮތުން ރައީސް މުއިއްޒު ހިތްޕުޅާވާ ގޮތަށް ފަނޑިޔާރުން ވަކިކުރި ނަމަވެސް ގާނޫނުން އެ ފަނޑިޔާރުންނަށް ލިއްބައިދޭ ހައްގުތަކުން މަހްރޫމުކުރުމަށް ފަހު ފަނޑިޔާރުކަމުން ވަކިކުރީ ރައީސް މުއިއްޒު ރުއްސުމުގެ ގޮތުން ކަމަށެވެ.

އެގޮތުން ރައްޔިތުންގެ މަޖިލީހަކީ މިއަދު ރައީސް މުއިއްޒު ގެންގުޅޭ އޮޅު މެމްބަރުންތަކެއް ތިބި ހިޔާއެއްގެ ގޮތުގައި ސިފަކުރައްވާ ރައީސް ޔާމީން ވިދާޅުވީ، އޮޅު ހިޔާގައި ކާންދީ ބޮޑު ކުރާ މެމްބަރުންނަށް މިއަދު ރައްޔިތުންގެ ހައްގުތައް މުހިއްމު ނޫންކަން މަންޒަރުތަކުން ފެންނަމުންދާ ކަމަށާ އެއީ ހިތާމެރި މަންޒަރެއް ކަމަށެވެ.

ރައީސް ޔާމީން ވިދާޅުވީ ފަނޑިޔާރުގެއަށް ދޭ ހަމަލާތަކަކީ ފަނޑިޔާރުންގެ ކްރެޑިބިލިޓީ ވެސް ނެތުމާއެކު އަމާޒުވެގެން ދާ ހަމަލާތަކެއް ކަމަށެވެ.