ޕްރޮސެކިއުޓާ ޖެހެރަލް އަކީ މަސްލަހަތު ޤާއިމް ކުރަން ޖެހޭ މީހެއްކަމުގައި ރައިސް އަބްދުﷲ ޔާމިން އަބްދުލް ޤައްޔޫމް ވިދާޅުވެއްޖެއެވެ.

ޕީއެންއެފްގެ ފްރޮންޓް އޮފީހުގައި ބޭއްވި ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، ޕްރޮސެކިއުޓަރ ޖެނެރަލް އަކީ ރައްޔިތުންނަށް އަދުލުވެރި ވާން ޖެހޭ ބައެއް ކަމަށެވެ.

އެ މަގާމުތަކުގައި ތިއްބާވާ ބޭފުޅުންނަކީ ދައުލަތު ހިމާޔަތުގައި ހުންނަވާއިރު ހަމައެކަނި ސަރުކާރުގެ ކޮޅު ނަގަން ޖެހޭ ބައެއް ނޫން ކަމަށާއި، ރައްޔިތުންނާއި ދޭތެރޭ އަދުލުވެރި ވާން ޖެހޭނެ ބައެއް ކަމުގައި ރައީސް ޔާމީން ވަނީ ވިދާޅުވެފައެވެ.

އެޓާނީ ޖެނެރަލްގެ މަޤާމަށާއި ޕްރޮސިކުޓަރ ޖެނެރަލްގެ މަގާމަށް އަންނަން ޖެހޭނީ ކަމަށް ޤާބިލު، ފުންނާބުއުސް ބޭފުޅުން ކަމުގައި އެމަނިކުފާނު ވަނީ ވިދާޅުވެފައެވެ.

އެ މަޤާމުތަކަކީ ސިޔާސީ މީހުން އައްޔާން ކުރެވިގެން ނުވާނެ މަޤާމުތަކެއް ކަމާއި އެ މަޤާމުތަކަކީ އެންމެ މަތީ ފަންތީގެ މަޤާމުތަކެއް ކަމުގައި ވެސް އެމަނިކުފާނު ވަނީ ވިދާޅުވެފައެވެ. މިފަދަ މަޤާމުތަކުގައި ތިބެން ޖެހޭ ފަރާތްތަކަކީ ވަކި ހުދޫދެއްގެ ތެރެއިން އަދުލުވެރި ކަމާއިއެކު މަސައްކަތް ކުރަން ދަންނަ ބަޔަކަށް ވާން ޖެހޭ ކަމުގައިވެސް އެމަނިކުފާނު ވަނީ ވިދާޅުވެފައެވެ.