ބްރޯޑްކާސްޓިން ކޮމިޝަންގެ ސާވާތައް ދިވެހި ފުލުހުންގެ އެހީތެރިކަމާ އެކު ރަނގަޅުކޮށްފިއެވެ.
މައުލޫމާތު ލިބިފައިވާ ގޮތުގައި ސާވާއަށް މައްސަލައެއް ދިމާވެ ބްރޮޑްކޮމްއިން ފުލުހުންގެ އެހީތެރިކަމަށް އެދުމުން ދިވެހި ފުލުހުން ވަނީ އެ ކޮމިޝަނުގެ ސާވާއަށް ދިމާވި މައްސަލަ ހައްލުކުރުމަށް މިއަދު ހަވީރު އެ ކޮމިޝަނަށް ވަދެފައެވެ.
މިކަމުގެ ތަފްސީލު ހިއްސާކުރައްވާ ފުލުހުން ވިދާޅުވީ، އެ ކޮމިޝަނަށް ވަދެފައި ވަނީ ފުލުހުންގެ ޑިޖިޓަލް ޑާޓާ ޓެކްނީޝަނުން ކަމަށާ އެ ކޮމިޝަނަށް ފުލުހުން ވަނީ މައްސަލައެއްގެ ތަހުގީގުގައި ނޫން ކަމަށެވެ. އަދި ބްރޮޑްކޮމްގެ ސާވާއަށް ދިމާވި މައްސަލަ ދެނެގަނެ ހައްލުކޮށްފައިވާ ކަމަށް މައުލޫމާތު ލިބިފައިވެއެވެ.
ބްރޮޑްކޮމްގެ ސާވާއަށް ކުއްލިއަކަށް މައްސަލައެއް ދިމާވިއިރު އެ ކޮމިޝަންގެ މުވައްޒަފުންތަކެއް ވަނީ މިއަދު މަސައްކަތް ހުއްޓާލާ ގެއަށް ވެސް ގޮސްފައި ކަމަށް މައުލޫމާތު ލިބިފައިވެއެވެ.
