ފުށާއި ކުޑަކުދިންގެ ކާނާގެ އިތުރުން ބޭސްފަރުވާއަށް ބޭނުން ކުރާ ތަކެތި ހިފައިގެން ދިޔަ 100 އެހީ ޓްރަކް ޣައްޒާއަށް ވަނުމަށް ބުދަ ދުވަހު ހުއްދަ ދީފިއެވެ.

ނަމަވެސް އދގެ އޮފިޝަލުން ރިޕޯޓްކޮށްފައިވާ ގޮތުގައި އެ ތަކެތި ބެހުމުގައި ދިމާވި ގޮންޖެހުންތައް ދިމާވެފައިވެއެވެ.

ބޮޑުވަޒީރު ބެންޖަމިން ނަތަންޔާހޫ ވިދާޅުވީ ރަހީނުކޮށްފައިވާ މީހުން އަނބުރާ ގެނެވޭނެ ގޮތް ހެދުމަށް ސަހްޔޫނީން ވަގުތީ ގޮތުން ހަނގުރާމަ ހުއްޓާލުމަށް ހުޅުވާލުމުގެ މަޝްވަރާތައް ކުރަން ތިބީ ތައްޔާރަށްކަމަށް ބުނެފައެވެ.

އެހެންނަމަވެސް ޣައްޒާގެ މުޅި ކޮންޓްރޯލް ހޯދުމަށް ހިންގާ އަސްކަރީ ކެމްޕޭން ކުރިއަށް ގެންދާނެ ކަމަށް އޭނާ ވިދާޅުވި އެވެ.

ޣައްޒާއަށް އެތެރެވާ ސާމާނަށް ހުރަސް އަޅައިތާ 11 ހަފްތާވަނީއެވެ.

11 ހަފްތާ ވަންދެން އެހީތައް ހުއްޓުވުމަށްފަހު ހޯމަ ދުވަހާއި އަންގާރަ ދުވަހު ޖުމްލަ 98 އެހީ ޓްރަކް ވަދެފައިވާ ކަމަށް ސަހްޔޫނީންގެ އަސްކަރިއްޔާއިންވަނީ ހާމަކޮށްފައެވެ.

މި ބްލޮކޭޑްގެ ސަބަބުން ޣައްޒާގެ ރައްޔިތުންގެ ދިރި އުޅުމުގެ ހާލަތުވަނީ ދުވަހެއް ދުވަހަކަށް ދަށަށް ގޮސްފައެވެ.

އެތައް ހާސް ޓަނެއްގެ ކާބޯތަކެއްޗާއި އެހެނިހެން މުހިންމު ތަކެތި ޣައްޒާއަށް ހުރަސްކުރާ ހިސާބުތަކުގެ ކައިރީގައި މަޑުކޮށްގެން ހުރި އިރު އާބާދީގެ ގާތްގަނޑަކަށް ތިންބައިކުޅަ އެއްބައި ތިބީ ބަނޑުހައިހޫނުކަމުގެ ތެރޭގައެވެ.