އިންޑިއާއިން ދިވެހި ރާއްޖެއާއި ދެކޮޅަށް ވާހަކަ ދައްކާ މި ގައުމުގެ ފަތުރުވެރިކަމަށް ލޮޅުންއެރުވުމަށް ކުރާ މަސައްކަތަކީ އެ ގައުމުގެ ފަތުރުވެރިކަން ކުރިއެރުވުމަށް ކުރާކަމެއްކަމަށް ދިވެހި ރައްޔިތުން ސޯޝަލް މީޑިއާގައި ގޮވާލައިފިއެވެ.

އިންޑިއާގެ ސަރުކާރުގެ ބައެއް ބޭފުޅުންނާއި އެ ގައުމުގެ ރައްޔިތުން ދަނީ ހުއްޓުމެއްނެތި ރާއްޖޭގެ ފަތުރުވެރިކަމަށް ގޮންޖެހުންތައް އަމާޒުކުރަމުންނެވެ. އަދި ދިވެހި ރާއްޖެއަށް އަންނަ އިންޑިއާގެ ފަތުރުވެރިން މަދުކުރާނެކަމަށް ވެސް އެކްސްގައި ކުރަމުން އަންނަ ޕޯސްޓު ތަކުގައި ވަނީ ބުނެފައިއެވެ.

މި ޕޯސްޓުތަކަށް ރައްދުދީ ދިވެހި ރައްޔިތުން ބުނެފައި ވަނީ ފާއިތުވެދިޔަ ފަސް އަހަރު ދުވަސް ތެރޭ ދިވެހި ރާއްޖޭގައި ބޭނުން ކުރެވެމުން އަންނަ "އިންޑިއާ މިލިޓަރީ އައުޓު" ޝިއާރު ބޭނުން ކުުރާކަން އިންޑިއާ ރައްޔިތުންނަށް އިންގޭނެ ކަމަށެވެ. އަދި އެއީ އެއްވެސް ހާލަތެއްގައި އެ ގައުމުގެ ރައްޔިތުންނާއި ދެކޮޅަށް ބޭނުން ކުރެވުނު ޝިއާރެއް ނޫން ކަމަށާއި އެ ޝިއާރު ބޭނުން ކުރެވުނީ ދިވެހި ފަސްގަނޑުން އެ ގައުމުގެ ސިފައިން ފޮނުވާލުމުގެ މަގްސަދުގައި ކަމަށްވެސް އެ ރައްޔިތުން ވަނީ ބުނެފައިއެވެ.

އަދި މި ޝިއާރަކީ އެއްވެސް ހާލަތެއްގައި އެ ގައުމުގެ ރައްޔިތުންނަށް ސިއްރުކޮށްފައިވާނެ ކަމެއް ނޫންކަމަށްވެސް ދިވެހިން ދަނީ ބުނަމުންނެވެ.

ނަމަވެސް މިހާރު މިފަދަ ޝިއާރުތަށް ބޭނުން ކޮށްގެން އެ ގައުމުގެ ރައްޔިތުންގެ ވިސްނުން ދިވެހިންނާއި ދެކޮޅުކޮށް މި ގައުމުގެ ފަތުރުވެރިކަން ދަށަށް ޖެއްސުމަށް ފަހު އެ ގައުމުގެ ފަތުރުވެރިކަން ކުރިއެރުވުމަށް މަސައްކަތް ކުރަމުން އަންނަ ޕޯސްޓުތަކާއި ވީޑިއޯތަށް ވަނީ ސޯޝަލް މީޑިއާގައި އާންމުވެފައިއެވެ.