ރައްޔިތުންގެ މަޖިލީހުގެ ގައްދޫ ދާއިރާގެ ކުރީގެ މެންބަރު އަހްމަދު ރަޝީދު މިއަދު އަވަހާރަވެއްޖެ އެވެ.

އެނގިފައިވާ ގޮތުގައި ރަޝީދު އަވަހާރަވީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް އައިޖީއެމްއެޗްގަ އެވެ. އެ ބައްޔަށް އޭނާ ފަރުވާ ހޯއްދަވަމުން ގެންދަވާތާ ދުވަސްތަކެއް ވެފައިވާ ކަމަށް ވެ އެވެ.

ގައްދޫ ދާއިރާގެ މެންބަރުކަން އޭނާ ކުރެއްވީ 18 ވަނަ ރައްޔިތުންގެ މަޖިލީހުގައި ރައީސް އަބްދުﷲ ޔާމީންގެ ވެރިކަމުގެ ދުވަސްވަރު އެވެ. އެ މަޖިލީހުގެ ދައުރުގައި މާލިއްޔަތު ކޮމިޓީ އާއި 241 ކޮމިޓީ ފަދަ މުހިންމު ކޮމިޓީތަކުގައި ވެސް ރަޝީދު މަސައްކަތް ކުރެއްވި އެވެ.

އަހްމަދު ރަޝީދަކީ ޕީޕީއެމްގައި އަދި ފަހުން ޕީއެންސީގެ ހަރަކާތްތަކުގައިވެސް އިސްކޮށް މަސައްކަތް ކުރެއްވި ބޭފުޅެކެވެ.