މިއަހަރު ރާއްޖެއިން ޙައްޖުގެ އަޅުކަމަށް ސަޢުދީ ޢަރަބިއްޔާއަށް ދަތުރުކުރި ޙައްޖުވެރިން މި މަހުގެ 13 ވާ ހުކުރު ދުވަހު އަންނަން ފަށާނެކަމަށް ހާމަކޮށްފިއެވެ.

ޙައްޖު މިޝަނުން ހާމަކޮށްފައިވާ ގޮތުގައި ހައްޖުވެރިން އެނބުރި އައުމަށް ހަމަޖެހިފައިވަނީ ހަތަރު ފްލައިޓަކަށް ބަހާލައިގެންނެވެ.

އެގޮތުން ޙައްޖުވެރިންގެ ފުރަތަމަ ފްލައިޓު ރާއްޖެއަށް އައުމަށް ހަމަޖެހިފައިވަނީ މި މަހުގެ 13 ވަނަ ދުވަހުއެވެ. އަދި ދެ ވަނަ ފްލައިޓު މި މަހުގެ 14 ވަނަ ދުވަހު އައުމަށް ހަމަޖެހިފައިވާއިރު ތިން ވަނަ ފްލައިޓުގެ ޙައްޖުވެރިން އައުމަށް ހަމަޖެހިފައިވަނީ މި މަހުގެ 16 ވަނަ ދުވަހުއެވެ. އަދި ފަހު ފްލައިޓުގެ ޙައްޖުވެރިން ރާއްޖެއަށް އެނބުރި އަންނާނީ މި މަހުގެ 17 ވަނަ ދުވަހުއެވެ.

ހައްޖުވެރިން ރާއްޖެ އައުމުން ބަލާ ދާއިރު، ކުޑަކުދިން ނުގެންދިއުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފައި ވެއެވެ.

މިގޮތަށް އެޗްޕީއޭއިން އިލްތިމާސްކޮށްފައި ވަނީ ހައްޖުވެރިންނާއި އުމްރާވެރިން އެނބުރި ރާއްޖެ އައުމާ ގުޅިގެން އާންމު ރޯގާތައް އިތުރުވެދާނެކަން ހާމަކޮށެވެ.

މިއަހަރު މައްކާ ރޫޓު އިނީޝިއޭޓިވްގެ ހިދުމަތް ރާއްޖެއަށް ލިބުމާއެކު، ޖިއްދާ އެއާޕޯޓުގައި ހައްޖުވެރިން ހޭދަކުރަންޖެހޭ ވަގުތު ވަރަށް ބޮޑަށް ކުޑަވެފައިވާކަން ހައްޖު މިޝަނުން ފާހަގަކޮށްފައިވެއެވެ.

ދިވެހިރާއްޖެއިން މިއަހަރު ޙައްޖުގެ އަޅުކަމަށް ގޮސްފައިވަނީ 1000 މީހުންނެވެ.