ސަހްޔޫނީން ދިން ހަމަލާތަކާއި ގުޅިގެން އިރާނުން ދޭ ރައްދު ހަމަލާގެ ގޮތުން މިސައިލް ބޭނުން ކޮށްގެން ސަހްޔޫނީންނަށް ހަމަލާތައް ދޭން ފަށައިފި އެވެ.
ސަހްޔޫނީންގެ އަސްކަރިއްޔާއިން އީރާނަށް ފަސް ބުރެއްގެ މަތިން މިހާތަނަށް ވައިގެ ހަމަލާތައް ދީފައިވާ ކަމަށް ސަހްޔުނީންގެ އަސްކަރިއްޔާގެ އޮފިޝަލަކު ޓައިމްސް އޮފް އިޒަރޭލްއާ ވާހަކަ ދައްކަމުން ބުނެފި އެވެ. މި ހަމަލާތައް އަމާޒުކޮށްފައިވަނީ އީރާނުގެ އަށް ތަނަކަށް ކަމަށް ވެސް އެ ހަބަރުގައި ބުނެ އެވެ.
ހަމަލާތަކާ ގުޅިގެން އިރާނުގެ ރޫހާނީ ލީޑަރު، އާޔަތުއްالله އަލީ ހަމަނާއީ ނެރުއްވި ސްޓޭޓްމެންޓެއްގައި ވިދާޅުވީ ސަހްޔޫނީންގެ ހަމަލާތަކުގައި އިރާނުގެ އަސްކަރީ ކޮމާންޑަރުންނާއި ނިއުކްލިއާ ސައިންޓިސްޓުން ޝަހީދު ކޮށްލާފައިވާ ކަމަށެވެ. އެ ހަމަލާގެ ބަދަލު ވަރަށް ހިތިކޮށް ލިބިގަންނާން ތައްޔާރުވުމަށް ހަމަނާއީ ވަނީ ސަހްޔޫނީންނަށް އިންޒާރު ކުރައްވައިފަ އެވެ.
ހަމަލާތައް ކުރިއަށް ދާއިރު އިޒްރޭލުން ބުނީ 100 ވަރަކަށް ޑްރޯން ސަހްޔޫނީން ދިމާލަށް އީރާނުން ފޮނުވާލާފައިވާ ކަމަށާއި އެ ޑްރޯންތައް އިންޓަސެޕްޓުކޮށް ވައްޓާލުމުގެ މަސައްކަތް މިހާރު ކުރިއަށްދާ ކަމަށެވެ.
އަނެއްކޮޅުން އީރާނުން ބުނި ގޮތުގައި ނިއުކްލިއާ ފެސިލިޓީތަކަށް ސަހްޔޫނީން ދިން ހަމަލާތަކަށް ފަހު ރޭޑިއޭޝަން ލީކުވުން ފަދަ އެއްވެސް ކަމެއްގެ ނިޝާނެއް އަދި ނުފެނެ އެވެ.
މިއަދުގެ ފަތިހު ސަހްޔޫނީން ދިން ހަމަލާތަކާ ގުޅޭގޮތުން ސަހްޔޫނީންގެ ބޮޑުވަޒީރު، ބެންޖަމިން ނަތަންޔާހޫ ބުނެފައި ވަނީ މި ހަމަލާތަައް ދީފައި ވަނީ އިރާނުގެ ނިއުކްލިއާ މަސައްކަތްތައް ކުރަމުންދާ ތަންތަނާއި ބެލިސްޓިކް މިސައިލް އުފައްދާ ކާރުހާނާތަކަށް ކަމަށެވެ.
ވީޑިއޯ މެދުވެރިކޮށް ދިން އެ މެސެޖުގައި ނަތަންޔާހޫ ބުނީ އިރާނުގެ ފަރާތުން އިޒްރޭލަށް އޮތް ނުރައްކާ އެއްކޮށް ނައްތައިލެވެންދެން ހަމަލާތައް ކުރިއަށް ގެންދާނެ ކަމަށެވެ.
ސަހްޔޫނީންގެ އަސްކަރިއްޔާއިން މި އޮޕަރޭޝަނަށް ނަން ދީފައި ވަނީ "ނޭޝަން އޮފް ލަޔަންސް" ގެ ނަމުންނެވެ.
