ރައްޔިތުންނަށް އެއްވެސް ކަމެއް ސިއްރުނުކޮށް ހިންގާނެ ކަމަށް ބުނި މި ސަރުކާރަށް 576 ދުވަސް ވީއިރު ރައީސުލްޖުމްހޫރިއްޔާ ޑރ. މުހައްމަދު މުއިއްޒު އާއި އެމަނިކުފާނު ސަރުކާރުގެ އިސްވެރިންގެ މާލީ ބަޔާންތައް އަދިވެސް ވަނީ ސިއްރުކޮށްފައެވެ.
އޮޑިޓާރ ޖެނެރަލް އޮފީހުގެ އޮފިޝަލަކާ ހަވާލާދީ އަދަދު ނޫހުގައި ހާމަކޮށްފައިވަނީ، ބައެއް ވެރިންގެ މާލީ ބަޔާންތައް އެ އޮފީހާ ހިއްސާކޮށްފައިވާ ކަމަށެވެ. ނަމަވެސް، އެ ބަޔާންތައް އޮޑިޓާރ ޖެނެރަލްގެ އޮފީހުން އާންމު ނުކުރާނެ ކަމަށާއި އާންމު ކުރާނީ ބަޔާން ހުށަހެޅި މީހުންގެ ތަފުސީލު ކަމަށް އޮފިޝަލު ވިދާޅުވި އެވެ.
މިސަރުކާރުގެ ވެރިންގެ މާލީ ބަޔާން ސިއްރު ކޮއްފައި ވާއިރު، ރައީސް މުއިއްޒު ހިމެނޭހެން ބޮޑެތި އެކިމަގާމު ތަކުގައި ތިއްބެވި ބޭފުޅުންނަށް އާންމުން ދަނީ ވައްކަމާއި ކޮރަޕްޝަނުގެ ތުހުމަތުތައް ކުރަމުންނެވެ.
ރައީސް މުއިއްޒު އެމަނިކުފާނުގެ ރިޔާސީ ކެމްޕޭނުގައި ވިދާޅުވެފައި ވަނީ، އެމަނިކުފާނުގެ ސަރުކާރެއްގައި އެއްވެސް ކަމެއް ރައްޔިތުންނަށް ނުފޮރުވާނެ ކަމަށާއި އަދި ރައްޔިތުންނަށާއި ނޫސްވެރިންނަށް ކަމެއް ނޭގިގެން އުޅެން ނުޖެހޭނެ ކަމަށެވެ.
