މިދިޔަ އޭޕްރިލް މަހުގެ 18 ވަނަ ދުވަހުގެ ރޭ ހ. މިޓާޒް ފުރާޅުމައްޗަށް ވެއްޓިފައި އޮއްވާ ފެނުނު ހައްވާ ޔުމްން ރަޝީދު ފަރުވާއަށް ފަހު ގެއަށް ދޫކޮށްލާފައިވާކަމަށާއި ނަމަވެސް އޭނާ އޮތީ ބަޔާން ދެވޭ ހާލަތެއްގައި ނޫންކަމަށް އާއިލާއިން ހާމަކޮށްފިއެވެ.
އައިޖީއެމްއެޗުގައި 10 ދުވަސްވަންދެން ފަރުވާ ދިނުމަށް ފަހު، އިތުރު ފަރުވާއަށް ޔުމްނު މެލޭޝިއާއަށް ގެންގޮސްފައިވަނީ 26 އޭޕްރީލްގައެވެ.
ޔުމްނުއަށް މެލޭޝިއާގެ ދެ ހޮސްޕިޓަލެއްގައި އެޑްމިޓްކޮށްގެން ފަރުވާ ދީފައިވައިވާއިރު ގިނަ ސާޖަރީތަކެއްވެސް ވަނީ ހަދާފައެވެ. އޭގެތެރޭގައި ނުރައްކާތެރި ރިސްކު ބޮޑު ސާޖަރީތައްވެސް ހިމެނެއެވެ.
މި މައްސަލަ ތަހުގީގު ކުރުމަށް ރައީސް މުހައްމަދު މުއިއްޒު ވަނީ ރިޔާސީ ކޮމިޝަނެއް އުފައްދަވާފައެވެ.
އެ ކޮމިޝަންގެ މަސައްކަތް ނިންމައި މިއަދު ރިޕޯޓް ރައީސަށް ފޮނުވިއިރު ޔުމްންގެ ބަޔާން ނުނަގާކަން ފާހަގަ ކުރެވެއެވެ. އެގޮތުން އެކަމަށް އާއިލާގެ ފަރާތުން އެއްބާރުލުމެއް ނުދިން ކަމަށް ކޮމިޝަނުންވަނީ ހާމަކޮށްފައެވެ.
އެކަމާއި ގުޅިގެން އާއިލާއިން ވަނީ ކޮމިޝަންގެ ވާހަކަތައް ދޮގުކޮށްފައެވެ. އަދި ރިޔާސީ ކޮމިޝަނަށް ޔުމްނުގެ މެޑިކަލް ރިޕޯޓް ހުށައަޅާފައިވާ ކަމަށާއި އެ ރިޕޯޓްގައި ޔުމްނު އަދި ބަޔާންދޭން ސިއްހީ ހާލަތު ތަން ނުދޭކަން ބަޔާންކޮށްފައިވާކަންވެސް އާއިލާއިން ބުނެފައިވެއެވެ.
