ރާއްޖޭގެ އިގުތިސާދީ ސަރަހައްދުގައި މަސްވެރިކަން ކުރަމުން ދަނިކޮށް އިންޑިއާ ސިފައިންތަކެއް ހަތިޔާރާ އެކީގައި މަސް ދޯނިތަކަށް އެރި މައްސަލައިގައި ޑިފެންސް މިނިސްޓަރު ޣައްސާން މައުމޫން، ރައްޔިތުންގެ މަޖިލިހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އަށް ހާޒިރު ކުރި ބައްދަލުވުން ސިއްރުކޮށްފިއެވެ.
އެ މައްސަލައިގައި ކޮމިޓީ ބައްދަލުވުން އެޖެންޑާ ކުރީ މިއަދު ހެނދުނެވެ. އެ ބައްދަލުވުމާ ގުޅިގެން ޑިފެންސް މިނިސްޓްރީން މަޖިލިހުގެ ކޮމިޓީ އަށް ސިޓީއެއް ވެސް ފޮނުވާފައިވެއެވެ، އެ ކޮމިޓީން ނިންމާފައިވަނީ އެ ސިޓީއާއި އެ ބައްދަލުވުން ސިއްރުކުރުމަށެވެ.
އިންޑިއާ ސިފައިން އަރައި ބިރު ދައްކާފައި ވަނީ "އަސުރުމާ-3"، "ނިރު-7" އަދި "މާހޯރަ-3" ދޯންޏަށެވެ.
އިންޑިއާ ސިފައިން އެ ދޯނިތަކަށް އަރައި ބަލައި ފާސްކޮށް އެތައް ގަޑިއިރެއް ވަންދެން އެ ދޯނިތަކުގައި ހަތިޔާރާ އެކުގައި ހަރަކާތްތެރިވި ކަމަށް އެ މަސްވެރިން ބުނެފައިވެއެވެ.
ރާއްޖޭގެ ޑިފެންސް މިނިސްޓްރީން ބުނެފައިވާ ގޮތުގައި، ރާއްޖޭގެ ތިން މަސް ދޯންޏަކަށް އަރާފައި ވަނީ އިންޑިއާގެ ކޯސްޓްގާޑު ޝިޕް 246 އަދި އިންޑިއާ ކޯސްޓްގާޑް ޝިޕް 253 ގެ ބޯޑިން ޓީމެވެ.
