ބައިނަލްއަގްވާމީ މީޑިއާތަކުން ސަހްޔޫނީއަށް ލިބޭ ގެއްލުން ދެއްކުން މަނާކުރަން އެ ގައުމުން ނިންމާއިފިއެވެ.
މިއަދު ހެނދުނު އީރާނުން ފޮނުވާލި މިސައިލް އަމާޒުވި ސަރަޙައްދުތަކުން ރިޕޯޓުކުރަމުންދިޔަ ބައެއް ބޭރުގެ ނޫސް އޭޖެންސީތަކުގެ ކުރަމުންދިޔަ ބްރޯޑްކާސްޓް ފުލުހުން ވަނީ ހުއްޓުވާފައެވެ.
ފުލުހުން ބުނިގޮތުގައި އަލްޖަޒީރާ ނިއުސް ނެޓްވޯކުން ހަމަލާދިން ތަންތަނުގެ ސާފު މައުލޫމާތު ހާމަކޮށްފައި ވާކަމަށެވެ. އަލްޖަޒީރާއަކީ މިދިޔަ އަހަރުގެ ކުރީކޮޅުއްސުރެ ސަހްޔޫނީންގައި މަނާކުރެވިފައިވާ ނެޓްވޯކެކެވެ.
އަލްޖަޒީރާއިން ހުއްދަނެތި އަދި ޤާނޫނާ ހިލާފު ކޮންޓެންޓް ފޮނުވުމަށް ބޭނުންކުރާ ނޫސް އޭޖެންސީތަކާއި ދެކޮޅަށް ފިޔަވަޅު އެޅުމަށް ޕެޓްރޯލް ޔުނިޓްތައް ފޮނުވި ކަމުގައި ސަހްޔޫނީންގެ ފުލުހުންގެ ތަރުޖަމާނަކު ބުނެފައެ ވެއެވެ.
ފުލުހުންގެ އޮފިސަރަކު ކެމެރާމަނަކަށް އޭނާގެ ރެކޯޑިން ޑިވައިސް ހަވާލުކުރުމަށް އަމުރުކުރާތަން ނޭޝަނަލް ސެކިއުރިޓީ މިނިސްޓްރީން ހިއްސާކުރި ވީޑިއޯއެއްގައި ފެނެއެވެ.
ކެމެރާމަން އިންކާރުކޮށް، ބުނެފައިވަނީ މި މިންޒަރުތައް ސީއެންއެން އިންނާއި، ބީބީސީ އަދި މީގެއިތުރުން މުޅި ދުނިޔެއަށްވެސް ފެންނަމުން ދާކަަމަށެވެ. އެހެންކަމުންއެކަން ހުއްޓުމަށޤ ކެމެރާމަން އިންކާރު ކުރާކަމަށެވެ. މީގެ އިތުރުން އަދި އެހެން ޗެނަލްތަކުން އަލްޖަޒީރާގެ ބްރޯޑްކާސްޓް ބޭނުން ކުރާކަމުގައި ވާނަމަ އެކަމަކާމެދު އޭނާއަށް އެއްވެސް ކަމެއް ނުކުރެވޭނެ ކަމަށް ވެސް ބުނެފައި ވެއެވެ.
ފުލުހުންގެ ތަރުޖަމާނެއް ބުނާގޮތުގައި މި ނިންމުން ނިންމާފައިވަނީ ނޭޝަނަލް ސެކިއުރިޓީ މިނިސްޓަރ އިތަމާރު ބެން-ވީރުގެ ސިޔާސަތާ އެއްގޮތަށް އަދި ޕޮލިސް ކޮމިޝަނަރު ޑެނީ ލެވީގެ އިރުޝާދުގެ ދަށުން ކަމަށެވެ.
މިސައިލް އަމާޒުވާ ތަންތަނުގެ ލޮކޭޝަން ބްރޯޑްކާސްޓް ކުރާ ބޭރުގެ މީޑިއާތަކާ ދެކޮޅަށް ފިޔަވަޅު އަޅާނެކަމަށް ބެން-ވީރު ވަނީ ވައުދުވެފައެވެ.
