ފުލުހުންގެ މުއައްސަސާ ވެފައި ވަނީ ދިވެހިންނަށް ހުރި ބޮޑުވޭނަކަށް ކަމަށާއި އެމަނިކުފާނުގެ ނަޒަރުގައި އެއީ ފެއިލް ވެފައި ވާތަނެއް ކަމުގައި ކުރީގެ ނައިބު ރައީސް ޑރ މުހަންމަދު ޖަމީލް އަހުމަދު ވިދާޅުވެއްޖެއެވެ.

އެބޭފުޅާ މިހެން ވިދާޅުވެފައި ވަނީ ޕީއެންއެފްގެ ފްރޮންޓް އޮފީހުގައި ބުރާސްފަތި ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުންނެވެ.

ފުލުހުންގެ މުއައްސަސާއިން ގެންގުޅެނީ މުއްސަދިން ވީމަ ވަކި ގާނޫނެއް އަދި ދެރަ ނިކަމެތި ކީހާއަށް ވަކި ގާނޫނެއްކަމުގައި ޑރ ޖަމީލް ތުހުމަތުކުރެއްވިއެވެ.

ރައީސް މުއިއްޒުގެ މައްޗަށް ކޮށްފައިވާ ނޫމަޑީގެ ތުހުމަތަކީ ކުޑަކަމެއް ނޫން ކަމަށާއި ވައްކަމާއި ހިޔާނާތައް ބަލާނަމަ އެއީ ވަރަށް ބޮޑު މައްސަލައެއް ކަމުގައި ޑރ ޖަމީލު ވިދާޅުވިއެވެ. އެހެން ގައުމެއްގެ ފުލުހުން ނަމަ މިފަދަ ބޮޑު މައްސަލައެވެ އެފުއް މިފުށަށް ޖަހާނެ ކަމުގައި ޑރ ޖަމީލް ވިދާޅުވިއެވެ.

ފުލުހުންގެ ފެއިލިއަރއެއްގެ ގޮތުގައި ފާހަގަކޮށް ޑރ ޖަމީލު ވިދާޅުވީ ދިމްޔާތުގައި ހިނގާފައިވާ މަރުގެ މައްސަލަ ނުބެލޭ ކަމަށާއި ޒަކިއްޔާގެ މަރުގެ މައްސަލާގެ އިތުރުން ޔުމްނުއާއި ދޭތެރޭ ކަންތައްވި ގޮތެއް ނުބެލޭ ކަމުގައި އެ ބޭފުޅާ ވިދާޅުވިއެވެ.

ރައީސް މުއިއްޒު މައްޗަށް އެތައް ވައްކަމުގެ ތުހުމަތުތަކާއި ވާރުތަ މުދާ ފޭރިގަތުމުގެ ތުމަތުގެ އިތުރުން މީހެއްގެ މަރެއްގައި ޝާމިލް ވެފައި ވާކަމުގެ ތުހުމަތު ކުރެވޭއިރު، މިފަދަ މައްސަލަތައް ފުލުހުންނަށް ތަހުގީގު ނުކުރެވޭ ކަމުގައި ޑރ ޖަމީލް ވިދާޅުވިއެވެެ.

ރައީސް މުއިއްޒު މިހާރު ހުންނެވި މާޤާމުން އެމަނިކުފާމަށް ކުރެވޭ ތުހުމަތު ތަކުން ބަރީއައް ވެގަންނަށް ފުލުހުން ނަށް އަމުރު ކުރެވޭނެ ކަމުގައިވެސް ޑރ ޖަމީލް ވިދާޅުވިއެވެ.