ސަރުކާރަކާ މެދު ރައްޔިތުން އެންމެ ދެކެން ބޭނުންވާނެ ދުވަހަކީ އެ ރައްޔިތުންނަށް ވީ ވައުދުތައް ރަނުންނަށް ފުއްދާ ދުވަހެކެވެ. ކަދުރު ރުކަށް އެރި މީހާގެ ނަދުރަށް ނުވެ އެ ވައުދުތަކާ އެ ހުވަފެން ތަކުގައި ކުލަ ޖެހި އުޖާލާ ޒަމާނަކަށް ހަޔާތުގެ ފަސް އަހަރެއް ދީއްލާލުމެވެ.

އެގޮތުން 2023 ވަނަ އަހަރު ވެސް ދިވެހި ރައްޔިތުން ބަދަލަކަށް ބޭނުންވެ ގެނައި ވެރިކަމުގެ ހަނީމޫނު އަދި ނުނިމިގެން އުޅެނިކޮށް އިވެން މިފެށީ މުޅިން އެހެން ރާގެކެވެ. އެހެން ބައެއްގެ އަމިއްލަ ރާގުތަކަށް ބަސްތައް ފައްތަން ވީމާ ޅެންވެރިންނަށް ވެސް އުނދަގޫ ވާ އުސޫލުން މިއަދުގެ ވެރިންވެސް މިއުޅެނީ އެފަދަ އުނދަގުލަކާ ކުރިމަތިވެގެން ކަމަށް ސިޔާސީ ފަންނުގެ އިސް ބޭފުޅުން ބުނަން ފަށައިފިއެވެ.

ދިވެހީިންގެ ރާއްޖޭއާ ދިވެހީންގެ މެނިފެސްޓޯއަކީ ރައީސް އަބްދުﷲ ޔާމީން ފަރުމާ ކުރެއްވި ކަންކަން ކަމަށްވުމުން އޭގެ އަސްލު ޝަރަހަ ގެންނަން އެހެން ބަޔަކަށް ނޭނގޭނެއެވެ.

އެމަނިކުފާނަކީ ގައުމު އިސްކުރައްވާ ދިވެހި ގައުމަށް ނިސްބަތްވާ ކޮންމެ ޚާސިއްޔަތަކީ ގައުމިއްޔަތުގެ ރުކުނެއްގެ ގޮތުގައި ދެކެވަޑައިގެން އެ ރުކުންތައް ހާސިލްކުރައްވަމުން ކަންކަން ކުރައްވަމުން ގެންދަވާ ބޭފުޅަކަށް ވާއިރު، ގައުމިއްޔަތުގެ ވާހަކަ އަދި ދައްކަވަން އެނގިވަޑއިގެންނެވި ނަމަވެސް އަމަލުން އެކަން ތަންފީޒުކުރައްވަން އަދުގެ ވެރިންނަށް ނޭނގިގެން އުޅޭ މަންޒަރު ފެންނަމުން އެބަދެއޭ ހިތާމައާ ލަދުވެތިކަމާ އެކު ދަންނަންވަން މަޖްބޫރުވެއެވެ.

ހުސް ގޮނޑީ ދައްކައިގެން ވެރިކަމަށް ވަޑައިގެން ތަސައްވުރެއްގެ ގޮތުގައި ނުވަތަ ތަރައްގީގެ ގޮތުގައި ދައްކަވަމުން ގެންދަވާ ހުރިހާ ވާހަކައަކީ އެއްކަލަ މެނިފެސްޓޯގައި ހިމަނާފައިހުރި ކަންކަންކަމަށް ވުމުން އެއީ ތިމާގެ ހިޔާލާތާ ފިކުރަށް ނުވުމުން ދެން އެކަން ކުރާނެ ގޮތެއް ތިމާ އަށް ނޭނގޭނެކަން ޔަގީނެވެ. މީދުލް ހައްތިން ވާފެން ބޯން އުޅެމުން ކަންކަން ތަންފީޒުކުރުމަކީ ނާދިރު ކަމެކެވެ.

ދަންނަވަން މިއުޅޭ ވާހަކައަކީ ރައީސް ޔާމީން ގެންނެވި ޕްލޭނަކާ އެކު ވެރިކަމުގެ ތަހުތުގައި ރެދަނލި ކުރެއްވި ނަމަވެސް އެ ޕްލޭން އެގްޒެކިއުޓުކުރާނެ ފެންވަރު ނުވަތަ ބުންވަރު ނުވަތަ ފަންވަރު އަދުގެ ވެރިންގެ ކިބައިގައި ނެތްކަމުގެ ވާހަކައެވެ.

މާކަ ދުރަކުން ނޫނެވެ. ކޫއްޑޫގައި އާދިއްތަ ދުވަހުން ފެށީގެން މަސްވެރިން ކުރަމުންދާ މުޒާހަރާތަކުގެ ހައްލު ނުހޯދިގެން އުޅޭ އުޅުމުން ވެސް އެކަން ނިކަން ރަގަޅަށް ސާފުވެއެވެ. މަސްވެރިންގެ ޝަކުވާތަކަށް ހައްލު ހޯދައިދޭން ނޭނގިގެން މިއުޅެނީ އަޅެ ފަހެ ކީއްވެބާއެވެ؟

އިގްތިސޯދު އެއްވެސް ވަރަކަށް ކިޔަވައިގެން ތިބި ނަމަ މިއީ ފެން ފޮދެއް ބޯލުންހާ ފަސޭހަ ކަމެކެވެ. ޔަގީނުންވެސް އަޅުގަޑު ނަމަ އަޅުގަޑުވެސް މިކަން ހައްލު ކުރީމުހެވެ. ދެން ތިޔަ ބޭފުޅުން ހިތްޕުޅަށް އަރާފާނެ ކޮބައިބާއޭ އެ ފޯމިއުލާއަކީ ދެއްތޯއެވެ؟

އާދެ އެ ފޯމިއިލާ މި ކިޔައި ދެނީއެވެ. ސަރުކާރުގެ ވެރިންވެސް ނިކަން ރަގަޅަށް ކަނުލާ އަޑު އައްސަވާށެވެ.

ވެރިކަމުގެ ދިފާއުގައި ކަހީނުންނާ މުޝީރުންނާ އަމީރުންނާ ވަޒީރުންނާ މިނެއްނެތް މިންވަރަށް އައްޔަންކުރަމުން ގެންދަވާއިރު، އެހުރިހާ މީހުންގެ އެއްމަހުގެ މުސާރަ ދެމަހުގެ މުސާރަ އެކަނި މަޑުޖައްސާލިޔަސް މަސްވެރިންނަށް ދޭން ހުރި ފައިސާ ދެވޭނެކަން ޔަގީނެވެ. ނިކަން މި ހިސާބު ދިމާވޭތޯ ހިސާބު ސޯ ކައިރިން އައްސަވަބައްލަވާށެވެ.

ކުރީ ސަރުކާރުގެ ދަރަަންޏާ އަރަންޏާ ބަރަންޏާ އޭ ކިޔާ ބަހަނާ ދެއްކުމުގެ ބަދަލުގައި މިކަންކަން ނިކަން ރަގަޅަށް ހިސާބު ޖަހައިގެން އެބަ ހައްލުކުރަން ޖެހެއެވެ.

ނަމަވެސް ދިވެހީންގެ ރާއްޖެ މެނިފެސްޓޯއަކީ ވަކި މާލިމީއަކު އޭނާގެ ސިޔާސީ އޮޑި ދުއްވުމުގެ ސަމުގާ އެއްގެ ގޮތުގައި ފަރުމާ ކުރި ކުރުން ކަމުގައިވުމުން އެ ސަމުގައި ދިވެހީންގެ ނައު ފަރަށް ނާރުވާ ދުވާނެ ގޮތް ކޮންމެ ކޮންމެ ކެޔޮޅަކަށް ފަހުމުނުވެދާނެއެވެ.

ކަނދި ކަމަނާ ވެސް މަސް ތެލުލީތާއެވެ. ނަމަވެސް އެފަދަ މީހުންގެ ކިބައިން ކަންކަން ވެގެން ދިޔަގޮތް ތާރީޚުން އޮތީ ފެންނަންށެވެ.

މިއަދު ސަރުކާރުގެ ވެސް ވާހަކަ އޮތީ ހަމައެހެންނެވެ. މިއަށް ވުރެ އަވަހަށް މުޅި ދުނިޔޭގައި ވެރިކަމެއްގެ އަގު ވެއްޓޫނު ވެރިކަމެއް ނެތެވެ. ނުރުހުން އަމާޒުވެ ފަލީހަތްވީ ވެރިކަމެއް ނެތެވެ. ވާނީވެސް އެހެންތާއެވެ. ވަޅި ދެކެ ގަބުޅިއާ ކާށި ކާން ވީމާ ވާނެ ހައެތި ވެނިމެނީވިއްޔާއެވެ.