ކަފިހި ހުރަސް މަތިން ދިޔަ މީހަކު ގައިގައި ސައިކަލުން ޖެއްސުމަށް ފަހު ފިލި މީހަކު ހައްޔަރުކޮށްފިއެވެ.
ހުޅުމާލޭގައި ކަފިހި ހުރަސް މަތިން މަގު ހުރަސްކުރި މީހެއްގެ ގައިގައި އެ މަގުން ދުއްވާފައި ދިޔަ ސައިކަލެއް ޖެހުމުން، ސައިކަލު ދުއްވަން އިން މީހާ މަޑުނުކޮށް ފިލި މައްސަލައެއް ފުލުހުންނަށް ރިޕޯޓުކުރުމުން މައްސަލައިގެ ތަހުގީގު ވަނީ ފަށަފައެވެ. އަދި ސައިކަލް ދުއްވަން އިން މުހައްމަދު ނާޝިއު 20، ގއ. މާމެންދޫ، މޫންލައިޓްވިލާ، ވަނީ ހައްޔަރުކޮށްފައެވެ.
އިއްޔެ ކޯޓު އަމުރެއްގެ ދަށުން އޭނާ ހައްޔަރުކޮށް ބަންދާމެދު ގޮތެއް ނިންމުމަށް މިއަދު ކޯޓަށް ހާޒިރުކުރުމުން ހަ ދުވަހަށް ބަންދުކުރުމަށް އަމުރުކޮށްފައިވާ ކަމަށް ފުލުހުން ހާމަކޮށްފައިވެއެވެ.
މިދިޔަ ހޯމަ ދުވަހު މި ހާދިސާ ހިނގިއިރު ނާޝިއުއަކީ ސައިކަލު ދުއްވުމުގެ ލައިސަންސް ނެތް މީހެއް ކަމަށް ފުލުހުން ބުނެފައިވެއެވެ
އެ އެކްސިޑެންޓްގައި އަނިޔާވެފައި ވަނީ ހުޅުމާލެ ފޭސް އެކެއް ނިރޮޅުމަގު، އައިއޯއެން ފިހާރަ ކުރިމަތީގައި އޮންނަ ކަފިހި ހުރަސް މަތިން މަގު ހުރަސްކުރި އުމުރުން 54 އަހަރުގެ ދިވެހި ފިރިހެނަކަށެވެ. އެ މީހާއަށް ސީރިއަށް އަނިޔާތަކެއް ލިބިފައިވާތީ އައިޖީއެމްއެޗް ދަނީ ފަރުވާދެމުންނެވެ.
