ސަރުކާރު ކުންފުނިތައް އޮޑިޓު ކުރަން ބޭނުންވާ މާލީ ބަޔާންތައް ހުށަހެޅުމަށް ދީފައިވާ މުއްދަތު ހަމަވިއިރު ވެސް 10 ކުންފުންޏަކުން އެ ލިޔެކިޔުންތައް ހިއްސާކޮށްފައިނުވެއެވެ.

އޮޑިޓު އޮފީހުން ހާމަކޮށްފައިވާ ގޮތުގައި ސަރުކާރުގެ ހިއްސާ އޮންނަ 29 ކުންފުންޏެއް އޮޑިޓު ކުރަން ނިންމާފައިވާ އިރު އޭގެ ތެރެއިން ބޭނުންވާ ވަގުތަށް މިދިޔަ އަހަރުގެ މާލީ ބަޔާންތައް އޮޑިޓު އޮފީހަށް ފޮނުވީ 16 ކުންފުންޏަކުން ކަމަށެވެ.

މާލީ ބަޔާންތައް ނުލިބުމާއި ގުޅިގެން އޮޑިޓު ވަގުތަށް ނިންމަން ހުރަސް ތަކެއް އެޅޭއޭ ކަމުގައި އެ އޮފީހުން ބުނެފައި ވެއެވެ.

މިކަމާއި ގުޅިގެން މާލީ ބަޔާންތައް ހޯދުމަށް ޕްރައިވަޓައިޒޭޝަން ބޯޑު (ޕީސީބީ) އަށް ސިޓީއެއް ފޮނުވާފައިވާ ކަމަށާއި އޮންނަ ތާރީހަށް އެ ބަޔާންތައް ދިނުމަށް ޕީސީބީން ކުންފުނިތަކަށް އަންގާފައިވާ ކަމަށް ވެސް ހާމަކޮށްފައި ވެއެވެ.

މިހާތަނަށް ޝާއިއުކޮށްފައިވަނީ ހަތަރު ކުންފުންޏެއްގެ އޮޑިޓު ރިޕޯޓެވެ. ރިޕޯޓިން ސްޓޭޖުގައި 6 ކުންފުންޏެއް އަދި ފީލްޑް ވޯކު ކުރަމުންދާ ހަތް ކުންފުންޏެއް ހިމެނޭ ކަމަށް އޮޑިޓު އޮފީހުން ހާމަ ކޮށްފައިވެއެވެ.