ބޮޑު ކަންނެލި މަސްވެރިން ބާނާ މަސް ކިރޭނެ ގޮތެއް ނެތް ކަމަށާއި ކިރޭނެ ގޮތެއް ނެތި މިހާރު ވެސް 120 ޓަނުގެ މަސް ދޯނިތަކުގައި އެބަހުރި ކަމަށް ބުނެ އިދިކޮޅު އެމްޑީޕީއަށް ނިސްބަތްވާ ވައިކަރަދޫ ދާއިރާގެ މެންބަރު ހުސެއިން ޒިޔާދު ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅުއްވައިފި އެވެ.
ރައްޔިތުންގެ މަޖިލިހުގެ މިއަދުގެ ޖަލްސާ އަށް އެ މައްސަލަ ހުށަހަޅުއްވަމުން ޒިޔާދު ވިދާޅުވީ، މިފްކޯ މެދުވެރިކޮށް ބޮޑުކަންނެލި ގަންނަ ގޮތަށް ބަދަލުކޮށް، މަސްވެރިންނަށް މިފްކޯގެ ހިއްސާ ލިބޭގޮތަށް ހަމަޖެއްސުމާ އެކު، ބޮޑުކަންނެލީގެ އަގު 100-80ރ. އާ ދެމެދުގައި ބެހެއްޓުމަކީ ރައީސް ޑރ. މުހައްމަދު މުއިއްޒުގެ ކެމްޕެއިން ވައުދުފުޅެއް ކަމަށެވެ.
މި މައްސަލަ ބަހުސް ކުރައްވަމުން ޒިޔާދު ވިދާޅުވީ، މި ވައުދުތަކާ ގުޅިގެން ރައީސް މުއިއްޒަށް ގިނަ އަދަދެއްގެ މަސްވެރިން ވޯޓުދިން ކަމަށާއި މިއަދު އެ މީހުން ތިބީ މާޔޫސްވެފައި ކަމަށެވެ. މަސްވެރިކަން ރަނގަޅުވާ ދުވަސްވަރު މަސް ނުކިރޭ މައްސަލަ ތަކުރާރުވަމުންދާ ކަން ވެސް އޭނާ ފާހަގަކުރެއްވި އެވެ.
މައްސަލައިގެ ބަހުސް ގައި ސަރުކާރަށް ނިސްބަތްވާ މެންބަރުން ވަނީ، މަސްވެރިންނަށް ޖެހޭ ހާލަކީ މިދިޔަ ސަރުކާރުގެ ސިޔާސަތުތަކާ ގުޅިގެން ޖެހިފައިވާ ހާލެއް ކަމަށެވެ. މި ސަރުކާރުން ދަނީ މަސްވެރިންގެ ހާލު ރަނގަޅު ކުރަމުން ކަމަށް ވެސް އެ މެންބަރުން ތަކުރާރުކޮށް ވިދާޅުވި އެވެ.
ކުއްލި މައްސަލައިގައި އޭނާ ގޮވާލެއްވީ މި މައްސަލަ ހައްލުކޮށް ރައީސް މުއިއްޒުގެ ރިޔާސީ ވައުދުތައް ފުއްދެވުމަށެވެ.
