ރައްޔިތުންގެ މަޖިލީހަށް އިންތިހާބުވި ޕާޓީން މެމްބަރަކު ވަކިވެއްޖެ ނަމަ އަދި ޕާޓީން ވަކި ކުރާ ހަލާތުގައި ދާއިރާގެ ރައްޔިތުންގެ ރިކޯލް ވޯޓަކަށް އަހަން ޖެހޭ ގޮތަށް އެންޓި ޑިފެކްޝަން ބިލެއް އެމްޑީޕީން މަޖިލީހަށް ހުށަހަޅައިފިއެވެ.

މަޖިލިސް މެންބަރުންގެ ގޮނޑި ގެއްލޭ ގޮތަށް އެންމެ ފުރަތަމަ އެންޓި ޑިފެކްޝަން ބިލެއް ހުށަހަޅާ ގާނޫނެއް އެކުލަވާލީ 18 ވަނަ ރައްޔިތުންގެ މަޖިލީހުގައެވެ. ޢެގެ ފަހުން ސަރުކާރު ބަދަލުވެ އެމްޑީޕީން ވަނީ އެ ގާނޫނު އުވާލައިފައެވެ.

ނަމަވެސް އަނެއްކާވެސް ސަރުކާރު އޭގެ ފަސް އަހަރު ފަހުން ބަދަލުވެ އެމްޑީޕީގެ ގިނަ މެމްބަރުންތަކެއް ސަރުކާރު ހިންގާ ޕާޓީއިން ގަނެލުމުން އެފަދަ ގާނޫނެއްގެ މުހިއްމުކަން އިހުސާސްކުރެވި، އެ ޕާޓީގެ ފަރާތުން ބާރަށު ދާއިރާގެ މެންބަރު އަހުމަދު އަބްދުﷲ ވަނީ އަނެއްކާވެސް އެންޓި ޑިފެކްޝަން ބިލެއް މަޖިލީހަށް ހުށަހަޅުއްވައިފައެވެ.

މިއަދު  އެމްޑީޕީގެ ޕީޖީ ގްރޫޕުން ބޭއްވި ބައްދަލުވުމުގައި ވަނީ އެ ބިލު މިހާރު މަޖިލީހަށް ހުށަހަޅާފައިވާ ކަން ހާމަކޮށްފައއެވެ. ނަމަވެސް، އެ ބިލުގެ މައްސަލަ ފެށުން ލަސްވަމުން ދަނީ ބިލު އެޖެންޑާ ކުރުމުގައި ދަތިތަކެއް ހުރުމުން ކަމަށް ޕީޖީ ގްރޫޕުން ހާމަކޮށްފައިވެއެވެ.

އެ ބިލުގެ ތަފްސީލް ދެއްވަމުން ތުޅާދޫ ދާއިރާގެ މެންބަރު ހިސާން ހުސެއިން ވިދާޅުވި ގޮތުގައި ކުރިން އޮތް ގާނޫނުގެ އެންމެ ބޮޑު އެއް މައްސަލައަކީ ސިޔާސީ ޕާޓީއަކުން މެންބަރު ވަކި ކުރުމުން އެ މެންބަރެއްގެ ގޮނޑި ހުސްވުމެވެ.

ސިޔާސީ ޕާޓީއަކަށް ނާޖާއިޒް ގޮތުގައި އެވަރުގެ ބާރެއް މެންބަރަކަށް ފޯރުވުމުގެ ފުރުސަތު އޮވެގެން ނުވާނެ ކަމަށް ހިސާން ވިދާޅުވިއެވެ.

ހިސާން ވިދާޅުވީ މިހާރު ހުށަހަޅާފައިވާ ބިލުގެ ތަފާތަކީ ސިޔާސީ ޕާޓިއަކުން ވަކި ކޮށްފި ނަމަ އެ ދާއިރާގެ ރިކޯލް ވޯޓަކަށް އިލެކްޝަންސް ކޮމިޝަން (އީސީ) އިން ދާން ޖެހޭނެ ކަމަށާއި އެ މެމްބަރެއްގެ ގޮނޑި ގެއްލޭނީ ދާއިރާގެ ރައްޔިތުން އޭނާ އަށް ނޫނެކޭ ބުނެފި ނަމަ ކަމަށެވެ.

އަދި އެ މެންބަރު އަމިއްލަ އަށް ޕާޓީން ވަކިވެއްޖެ ނަމަ އޭނާ ގޮނޑިން އިސްތިއުފާ ދެއްވަން ޖެހޭނެ ކަމަށް ވެސް ހިސާން ވިދާޅުވިއެވެ.

ޖިލީހަށް އިންތިހާބުވާ ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ މަޖިލީހުގެ މެމްބަރުކަމުން ވަކިވާނެ ކަމަށް 2017ވަނަ އަހަރު ސްޕްރީމް ކޯޓުން ކަނޑައެޅި އިރު އެންޓި ޑިފެކްޝަން ގާނޫނެއް ހަދަން ވެސް މަޖިލީހަށް ލާޒިމް ކުރި އެވެ. އެގޮތުން:

• އެ ގާނޫނު މަޖިލީހުން ފާސްކޮށް އޭރުގެ ރައީސް އަބްދުﷲ ޔާމީން ތަސްދީގު ކުރެއްވި

• ނަމަވެސް އުފެދުނު ހިޔާލު ތަފާތުވުންތަކަށް ފަހު، އެ ގާނުނޫ އުވާލަން މަޖިލީހުގެ އަގުލަބިއްޔަތުން ފާސްކުރީ 1 ނޮވެމްބަރު 2018ގައެވެ.