އދ. އަތޮޅުން ފެށިގެން އައްޑޫ ސިޓީއަށް ގައުމީ މޫސުމާ ބެހޭ އިދާރާ (މެޓް) އިން ހުދު ސަމާލު ނެރެފިއެވެ.

މޫސުން ގޯސްވާނެ ކަމަށް ލަފާކޮށް އެ އަތޮޅުތަަކަށް މެޓުން ހުދު ސަމާލު ނެރެފައިވަނީ މެންދުރު 13:15 އިން ފެށިގެން އިރުއޮއްސި 06:00 އަށެވެ.

ސަމާލުގައި ބުނެފައިވަނީ ބޯކޮށް ވާރޭވެހުމާއެކު ގުގުރާނެ ކަމަށް ލަފާކުރެވޭ ކަމަށާ ވިލާގަނޑުގައި ގަޑިއަކު 40 މޭލަށް ވައި ގަދަވާނެ ކަމަށެވެ.

މި ދުވަސްވަރު ކުރަމުން ދަނީ ހުޅަނގު މޫސުމުގެ ވިއްސާރަ ކަމަށާ އަދި ރާއްޖޭގެ އެކި ހިސާބުތަކަށް މި ދުވަސްކޮޅު ވިއްސާރަކުރާނެ ކަމަށް މެޓުން ބުނެފައިވެއެވެ.

އުތުރުގެ ރަށްތަކަށް މޫސުން އެހާ ގޯސްނުވާނެ ކަމަށާއި ނަމަވެސް ދޭތެރެ ދޭތެރެއިން ވާރޭ ވެހުމުގެ ފުރުސަތު އެބައޮތް ކަން ހާމަކޮށް އިތުރަށް ބުނެފައިވަނީ ހުޅަނގާއި ހުޅަނގުއުތުރުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައިގަދަވުން އެކަށީގެންވާ ކަމަށް ވެސް ލަފާކުރާ ކަމަށެވެ.

މީގެ އިތުުރުން ދެކުނުގެ އަތޮޅުތަކަށް ކަނޑު މަޑުވާނެ ކަމަށާ ނަމަވެސް، އެހެން ސަރަހައްދު ތަކަށް އާދައިގެން ވަރަކަށް ކަނޑު ގަދަވެ ވިލާގަނޑުގައިވެސް ކަނޑު ގަދަވާނެ ކަމަށް ލަފާކޮށްފައިވެއެވެ.