ވިލިމާލެ ކައިރިން ކަނޑުމަތީގައި ރޭ ހިނގި ލޯންޗު އެކްސިޑެންޓުގައި އަނިޔާވި ދެ މީހެއްގެ ހާލު ސީރިއަސްވެ އައިސީޔޫގައި ފަރުވާ ދޭން ފަށައިފިއެވެ.
އައިޖީއެމްއެޗްގެ މީޑިއާ އޮފިޝަލް މީޑިއާތަކަށް މައުލޫމާތު ދެއްވަމުން ވިދާޅުވީ، މި އެކްސިޑެންޓްގައި އަނިޔާވި ތިން މީހަކު ދޫކޮށްލާފައިވާއިރު، ދެ މީހަކަށް އައިސީޔޫގައި ފަރުވާދެމުންދާ ކަމަށެވެ. އަދި އެކަކަށް ވޯޑުގައި ފަރުވާދެމުންދާ ކަަމަށްވެސް އޮފިޝަލް ވިދާޅުވިއެވެ.
ރޭ 7:48 ހާއިރު ހިނގި އެ ހާދިސާގައި 13 މީހަކަށް އަނިޔާވެ ވިލިމާލެ ހޮސްޕިޓަލުގައި ވަނީ ފަރުވާދީފައެވެ. ނަމަވެސް އޭގެ ތެރެއިން 7 މީހަކު އިތުރު ފަރުވާއަށް އައިޖީއެމްއެޗަށް ބަދަލު ކޮށްފައި ވަނީ ރޭގެ ވަގުތެއްގައެވެ.
މި އެކްސިޑެންޓްގައި އަނިޔާވެގެން ގެންދިޔަ މީހުންގެ ތެރޭގައި އެފްކޮންސް ކުންފުނީގެ 10 މުވައްޒަފަކާއި އަނަންތްރާ ލޯންޗްގެ ތިން މީހެކެވެ.
މި އެކްސިޑެންޓާއި ގުޅިގެން އެ ސަރަހައްދުގައި މެރިން ފުލުހުން ހަރަކާތެރިވެފައިވެއެވެ.
