އައު ޓާމިނަލް ހުޅުވަން ރައީސް މުހައްމަދު މުއިއްޒުގެ ސަރުކާރުން ބޭއްވި ޑްރޯން ޝޯގައި ބޭނުންކުރި ޑްރޯންތަކުގެ ކޮންޓްރޯލު ގެއްލި އެތަން މިތަނަށް ވެއްޓެމުން ދާކަމަށް އަޑުތަކެއް ފެތުރިއްޖެއެވެ.
ސޯޝަލް މީޑިޔާގައި ވީޑިއޯއާ އެކު އާންމު ފަރުދަކު ކުރި ޕޯސްޓެއްގައި ބުނެފައިވަނީ މިރޭގެ ޝޯގައި ބޭނުންކުރި އެތައް ސަތޭކަ ޑްރޯންތަކެއްގެ ކޮންޓްރޯލު އެމްއޭސީއެލްގެ މުވައްޒަފުންނަށް ގެއްލިފައިވާ ކަމަށާ މިހާރު ޑްރޯންތައް ދަނީ އެ ތަން މިތަނަށް ވެއްޓެމުން ކަމަށެވެ.
އެގޮތުން އެމީހާ ވަނީ މޫދަށް ވެސް ބައެއް ޑްރޯނު ވެއްޓޭ މަންޒަރާ އަދި އެއާޕޯޓުގެ އެކި ސަރަހައްދުތަކަށްވެސް ޑްރޯން ވެއްޓެމުންދާ މަންޒަރު ފެންނަ ވީޑިއޯ ހިއްސާކޮށްފައެވެ.
މިކަމާ ގުޅިގެން ކަމާ ގުޅުން ހުރި އިދާރާއެއްގެ ބަހެއް އަދި ލިބޭގޮތް ވަނީ ނުވެފައެވެ.
