ފިނޭންސް މިނިސްޓްރީން ކޮރަޕްޝަން މުޅިން ތަފާތު ހަރުފަތަކަށް އުފުލާލައިފި ރައީސް އަބްދުﷲ ޔާމީންގެ އިސް ގާނޫނީ ވަކީލް ޑރ މުހައްމަދު ޖަމީލް ވިދާޅުވެއްޖެއެވެ.

ޑރ ޖަމީލް މި ތުހުމަތު ކުރައްވާފައިވަނީ ސޯޝަލް މީޑިއާގައި ކުރެއްވި ޕޯސްޓެއްގައެވެ.

ޑރ. ޖަމީލްގެ ޕޯސްޓުގައި ފާހަގަކުރައްވާފައިވާ ގޮތުގައި، މިހާރުގެ ޕީއެންސީ ސަރުކާރަށް ވެރިކަން ލިބުނު ހިނދު، ދުރުގައި ކުޅިބަލަން ތިބި އެތައް ބަޔަކު ކުއްލިޔަކަށް އެތެރެއަށްވަދެ ދެމިގަތީ ލޮދި ހިކާތަކެއްހެންނެވެ.

އޭނާ ވިދާޅުވީ، މި ބަޔަކު ފާއިތުވި ފަސް އަހަރު ބަޔަކު ގައުމަށްޓަކައި ބުރަ މަސައްކަތް ކުރާތަން ދުރުން ބަލައި، ޤައުމު ކޮޅާލުމުގެ ރޭވުންތައް ރާވަން ތިބީ ކަމަށެވެ. ޑރ. ޖަމީލްގެ ތުހުމަތުތަކަށް ބަލާއިރު، ދައުލަތުގެ ބޮޑަތި ކުންފުނިތަކުން ކުރާ ކޮންމެ ޕާޗޭސެއް ހިންގަންޖެހެނީ މާލީ ވަޒީރު ދުރާލާ ހޯއްދަވާފައިވާ ކޮޓޭޝަންތަކެއްގެ މައްޗަށް ކަމަށް ބެލެވެއެވެ. މިކަމުގެ މިސާލެއްގެ ގޮތުން ޑރ ޖަމީލް ފާހަގަކުރައްވާފައިވަނީ، ކުންފުންޏަކުން 10 މިލިއަން ޑޮލަރުގެ ވެހިކަލްތަކެއް ގަންނައިރު، އޭގެ ތެރެއިން 5 ވަރަކަށް މިލިއަން ޑޮލަރު ޖީބަށް ލުމަށް ތުހުމަތު ކުރެވޭ ކަމެވެ.

ޑރ. ޖަމީލް ޕޯސްޓުގައި އިތުރަށް ވިދާޅުވެފައިވަނީ، އެގައުމެއްގެ މާލީ ވުޒާރާ ކޮރަޕްޝަނަށް ދެވިހިފައިފިނަމަ، އެގައުމެއް ގެނބިގެންދާނީ ބޮކިޖަހާފައި ކަމަށެވެ. މި ތުހުމަތުތަކާ ގުޅިގެން ފިނޭންސް މިނިސްޓްރީއާއި ދައުލަތުގެ ކަމާބެހޭ އިދާރާތަކުން އަދި ވަކި އެއްޗެއް ބުނެފައެއް ނުވެއެވެ.