ރާއްޖޭގެ ބޮޑު ސަރަހައްދަކަށް މޫސުން ވަރަށް ގޯސްވާނެ ކަމަށް ލަފާކޮށް ޔެލޯ އެލާޓް މޫސުމާއި ބެހޭ ޤައުމީ އިދާރާއިން ނެރެފިއެވެ.
މެޓް އޮފީހުން ޔެލޯ އެލާޓް ނެރުނީ ހއ. އަތޮޅުން ފެށިގެން ކ. އަތޮޅަށް މިއަދު ހެނދުނު 7:30 އިން މެންދުރު ފަހު 1:30 އަށެވެ. އެ ސަރަހައްދުގެ ރަށްރަށަށް އާންމު ގޮތެއްގައި ވައިޖެހޭނީ ގަޑިއަކު 25 މޭލާއި 30 މޭލާ ދެމެދުގެ ބާރުމިނުގަ އެވެ. އަދި ވިލާގަނޑުގައި ގަޑިއަކު 50 މޭލަށް ވައިގަދަވުން އެކަށީގެންވާ ކަމަށް މެޓް އޮފީހުން ބުންޏެވެ.
މެޓް އޮފީހުން ބުނީ ވައިގަދަވެ، ކަނޑުތައް ވެސް ވަރަށް ގަދަވާނެ ކަމަށެވެ.
އއ. އަތޮޅުން ފެށިގެން ލ. އަތޮޅަށް މިއަދު ހެނދުނު 7:30 އިން މެންދުރު ފަހު 1:30 އަށް ވައިޓް އެލާޓް ވެސް މެޓް އޮފީހުން ވަނީ ނެރެފަ އެވެ. އެ ސަރަހައްދުގެ ރަށްރަށަށް އާންމު ގޮތެއްގައި ވައިޖެހޭނީ ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ކަމަށާއި ވިލާގަނޑުގައި ގަޑިއަކު 45 މޭލަށް ވައިގަދަވުން އެކަށީގެންވާ ކަމަށް މެޓް އޮފީހުން ބުންޏެވެ.
ހުޅަނގު މޫސުމުގެ ބާރުގަދަވެ، މިދިޔަ ހަފުތާއިން ފެށިގެން ރާއްޖެއަށް މޫސުން ވަރަށް ގޯހެވެ. މޫސުން ގޯސްވެ އިއްޔެ ވެސް ވަނީ އެކި ފަހަރު މަތިން އުތުރާއި މެދު ރާއްޖެ ތެރޭގެ އަތޮޅުތަކަށް ވައިޓް އެލާޓް ނެރެފަ އެވެ.
މެޓް އޮފީހުން ކުރިން ބުނެފައިވާ ގޮތުގައި، މޫސުން ރަނގަޅުވާން ފަށާނެ ކަމަށް ބެލެވެނީ އަންނަ ބުރާސްފަތި ދުވަހުން ފެށިގެންނެވެ.
މިއީ ކަނޑުގަދަ ދުވަސްވަރަކަށް ވާތީ، ކަނޑުދަތުރުކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް ކަމާބެހޭ އިދާރާތަކުން ވަނީ އިލްތިމާސްކޮށްފަ އެވެ.
