މާލޭގެ ގެތަކުން ކުނި އުކާލުމުގެ މަސައްކަތް ކުރަމުން އަންނަ ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ މުވައްޒަފުން ގަވާއިދުން ކުނި ނަގަން ގެތަކަށް ނުދާ ކަމުގެ ޝަކުވާ ބޮޑުވެއްޖެ އެވެ.

މި މައްސަލާގައި ބައެއް އާންމުން ދިރިއުޅޭ ގޭގެ އެއްވެސް ފްލޯއަކުން ވެމްކޯއިން ކުނި ނުނަގާތާ ހަތަރު ދުވަސް ވެފައިވާ ކަމަށް މައުލޫމާތު ވަނީ ލިބިފައެވެ.

މިކަމާ ގުޅޭގޮތުން މީހަކު ބުނި ގޮތުގައި އެ ގެއިން ކުނި ނަގަން އަންނަނީ ދެ ދުވަހުން އެއް ދުވަހެވެ. އެގޮތަށް އަންނަނީ، ވެސް ކޮންމެ ދުވަހަކު ގުޅައި އުނދަގޫ ކޮށްގެން ކަމަށް އޭނާ ބުންޏެވެ.

މިކަމާ ގުޅިގެން ވެމްކޯއިން އެއްވެސް މައުލޫމާތެއް ދީފައެއް ނުވެއެވެ.

ވެމްކޯގެ މުވައްޒަފަކު ބުނި ގޮތުން ގަވާއިދުން ގެތަކަށް ނުދެވެނީ، ވެމްކޯގައި ކުނި ނެގުމުގެ މަސައްކަތްކުރާ މީހުން މަދުވުމުން ކަމަށެވެ.

އަމީނީ މަގުގެ މާފަންނު ކޮޅުން ފެށިގެން މަޖީދީ މަގާ ހަމައަށް ކުނި ނަގަން އެއް ރެއިން އެއް ރެއިން ޖެހޭކަމަށާއި މި މަސައްކަތް ކުރަން ތިބެނީ 3 މީހުން ކަމަށް މި މުވައްޒަފު ވަނީ ބުނެފައެވެ.

މީގެ ނުވަ އަހަރު ކުރިން 2016 ގައި ވެމްކޯއިން ކުނި ނެގުމުގެ މަސައްކަތް ފެށިއިރު އެ ކުންފުނީގައި ތިބި 90 ޕަސެންޓު މުވައްޒަފުންނަކީ ދިވެހިންނެވެ. ނަމަވެސް މިހާރު އެ އަދަދު ވަރަށް ބޮޑަށް ވަނީ ދަށްވެފަ އެވެ.