ޕްރައިވެޓް ސްކޫލްތަކުގައި 11-12އިގައި ކިޔަވާ ދަރިވަރުންގެ ހުރިހާ ހަރަދުތައް މީގެ ފަހުން ކުރަން ޖެހޭނީ ދަރިވަރުންގެ ބެލެނިވެރިން ކަމަށް ނިންމާ އެޑިއުކޭޝަން މިނިސްޓްރީން ސްކޫލްތަކަށް އެކަން އަންގައިފިއެވެ.

ޕްރައިވެޓް ސްކޫލްތަކުގައި 11-12އިގައި ކިޔަވާ ކުދިންނަށް ސަރުކާރުން ފީ ދެއްކުން ހުއްޓާލަން ނިންމިކަން ހާމަވީ އެޑިއުކޭޝަން މިނިސްޓްރީން އާއްމު ކުރި ސްކޫލްތަކަށް ކުދިންވެއްދުމާއި އެއް ސްކޫލުން އަނެއް ސްކޫލަށް ދަރިވަރުން ބަދަލުކުރުމާއި ގުޅޭ އާ އުސޫލުގައެވެ. އެ އުސޫލު ހާމަކޮށްފައި ވަނީ ނިމިދިޔަ މަހު 15 ވަނަ ދުވަހުގައެވެ.

އެ ސަރކިއުލަރގައި ތައުލީމުގެ ޤާނޫނުގައި ބަޔާންކުރާ އުނގެނުމުގެ ހައްގު ކުޑަކުދިންނަށް ކަށަވަރުކޮށްދިނުމަށް ސްކޫލްތަކަށް ކުދިން ވެއްދުމާއި އެއް ސްކޫލުން އަނެއް ސްކޫލަށް ބަދަލުކުރުމުގައި ހުރިހާ ސްކޫލަކުން އަމަލުކުރަން ޖެހޭ މިންގަނޑު ހާމަކޮށްފައިވެއެވެ.

15 ޖުލައި 2025 އިން ފެށިގެން ސްކޫލްތަކަށް ކުދިން ވެއްދުމުގައި އަމަލުކުރަން ވާނީ މި ސަރކިއުލަރ އަށް ކަަމަށް ވަނީ ބުނެފައެވެ.

އެ ސަރކިއުލާގައި ބުނެފައި ވަނީ ސަރުކާރު ސްކޫލުން ޖާގަ އަށް އެދި ހުށަހަޅާޖާގަ ނުލިބޭ ހާލަތުގައި މިނިސްޓްރީގެ ފަރާތުން އެހެން ސްކޫލަކުން ޖާގަ ހަމަޖައްސާދޭ ދަރިވަރުންނަށް، އެ ޖާގަ ހަމަޖައްސައިދޭ މުއްދަތަކަށް މިނިސްޓްރީގެ ފަރާތުން ފީ ދައްކާދޭނެ ކަމަށެވެ.

މީގެ އިތުރުން އެފަދަ ދަރިވަރުންނަށް ސަރުކާރު ސްކޫލަކުން ޖާގަ ހަމަޖެއްސުމުން، އެ ޖާގަ ލިބުނު ސްކޫލަށް ދަރިވަރުން ބަދަލުކުރަން ވާނެ ކަަމަށް އެ ސަރކިއުލާގައި ވަނީ ބުނެފައެވެ. އަދި އެގޮތަށް އެންގުމުން ދަރިވަރު ސްކޫލް ބަދަލު ނުކޮށްފި ނަމަ އެ ހާލަތުގައި ދަރިވަރުގެ ފީ އާއި އެހެނިހެން ޚަރަދުތައް ކުރާނި ބެލެނިވެރިން ކަމަށް ވަނީ ބަޔާންކޮށްފައެވެ.

މިގޮތަށް ހަމަޖައްސާފައި މި ވަނީ ދަރިވަރުންގެ އޯލެވެލް ނަތީޖާ ލިބެން ކުޑަތަން ވެފައި ވަނިކޮށެވެ. އަދި މިފަދަ ނިންމުމެއް ދަރިވަރުން 11 އަށް ވަނުމާއި ކައިރިވެފައި ވަނިކޮށް ނިންމުމުން ގިނަ އަދަދެއްގެ ބެލެނިވެރިން ވަނީ ކަންބޮޑުވުން ފާޅުކޮށްފައެވެ.

މިއީ ދަރިވަރުންނަށް ދެވޭ ވަރަށް ބޮޑު އަނިޔާ އެއް ކަަމަށް ޤަބޫލުކުރާ ކަމަށް ބައެއް ބެލެނިވެރިން ވަނީ ބުނެފައެވެ. މީގެ ކުރިން ގްރޭޑް 11 -12 އަށް ދާ ނަމަ އޯލެވެލްގައި ވަކި ޕަރސަންޓެއް ލިބޭ ނަމަ ފީކަވަރ ކުރާނެކަމުގެ ޔަޤީންކަން ސަރުކާރުގެ ފަރާތުން ދީފައި ވަނިކޮށް، ކުއްލިއަކަށް އެކަން ބަދަލުވުމަކީ ބެލެނިވެރިންނަށް ވެސް ލިބޭ ކުއްލި މާލީ ބުރައެއް ކަން ފާހަކުރެވެއެވެ.

ބެލެނިވެރިން ވަނީ މިއީ ވަރަށް ބޮޑަށް ކަންބޮޑުވާ ކަމެއް ކަަމަށާއި ބެލެނިވެރިންނާއި މަޝްވަރާ ނުކޮށް މިފަދަ ނިންމުމެއް ނިންމުމުން މިނިސްޓްރީން މިކަން ސިއްރުން ކުރަން ބޭނުންވިކަން ހާމަވާ ކަަމަށް ފާހަގަކޮށްފައެވެ.

މި ބަދަލުގެ ސަބަބުން ގިނަ ޕްރައިވެޓް ސްކޫލްތަކަށްއެންޓްރެންސް ފީގެ ގޮތުގައި 3000 ރުފިޔާ ، މަހަކު 3000 ރުފިޔާ މަދުވެގެން ބެލެނިވެރިން ހޭދަކުރާނެއެވެ.