ތަރައްގީއޭ ބުނުމުން ދިވެހިންގެ ސިކުނޑިއަށް އަންނާނީ އެންމެ ނަމެއްކަމަށާ އެއީ ރައީސް އަބްދުﷲ ޔާމީންގެ ނަންފުޅު ކަމަށް އެމަނިކުފާނުގެ ޕާޓީ އުފެއްދުވެމުގައި އިސްކޮށް ހަރަކާތްތެރިވާ ޑރ. ޖިހާދު ހަސަން ވިދާޅުވެއްޖެއެވެ.

ރައީސް ޔާމީންގެ ތާއީދާއެކު މަޖިލިސް އިންތިހާބުގައި ވާދަކުރާ ކެންޑިޑޭޓުންގެ ސިޔާސަތުތައް ހާމަކުރުމަށް ބޭއްވި ފުރަތަމަ ޖަލްސާގައި އާދިއްތަ ދުވަހުގެރޭ ދަ ފްރޮންޓް އޮފީހުގައި ވާހަކަ ދައްކަވަމުން ޑރ. ޖިހާދު ވިދާޅުވީ، ރައީސް ޔާމީންގެ ނަންފުޅު ގުޅިފައިވަނީ ތަރައްގީއާ ކަމަށާ އެއީ ދިވެހި ކޮންމެ ދަރިއަކުވެސް ދަންނާނެ ހަގީގަތެއް ކަމަށެވެ.

ޑރ. ޖިހާދު ވިދާޅުވީ އަދިވެސް ދިވެހިން ބޭނުންވަނީ އެފަދަ ތަރައްގީއާ ކުރިއެރުން ކަމަށާ އެހެން ކަމުން މަޖިލީހުގެ ތެރެއިން ރައީސް ޔާމީންގެ ތަރައްގީގެ ފިކުރު ކުރިއަރުވާ ރައްޔިތުންނަށް ފައިދާހުރި ކަންކަން ހޯދަން މަސައްކަތްކުރުމަކީ މުހިއްމު ކަމެއް ކަމަށެވެ.