ކުރިއަށް އޮތް ލޯކަލް ކައުންސިލު އިންތިހާބަށް ވާދަ ކުރައްވާ ހުރިހާ ކެންޑިޑޭޓުން ވެސް މިނިވަން ކެންޑިޑޭޓުންގެ ގޮތުގައި ކުރިމަތިލައްވަން ރައީސް އަބްދުﷲ ޔާމީން އިލްތިމާސްކުރައްވައިފިއެވެ.

އާދިއްތަ ދުވަހުގެރޭ ޕީއެންއެފުން ބޭއްވި ޖަލްސާގައި އެމަނިކުފާނު ވަނީ ކައުންސިލުތަކުގެ ބާރުތައް ހަނިވާ ގޮތަށް ރައްޔިތުންގެ މަޖިލީހަށް ސަރުކާރުން ހުށަހަޅައި ފާސްކޮށްފައިވާ ލާމަރުކަޒީ ގާނޫނުގެ އިސްލާހުތަކާ މެދު ކަންބޮޑުވުން ފާޅުކުރައްވާފައެވެ.

އެގޮތުން ރައީސް ޔާމީން ވިދާޅުވީ ވެރިކަން ކުރާ ޕާޓީ، ޕީއެންސީގެ ކެންޑިޑޭޓެއްގެ ގޮތުގައި ކައުންސިލް އިންތިހާބަށް ވާދަކުރި ނަމަވެސް އަދި އިދިކޮޅުގައި އޮތް އެމްޑީޕީގެ ކެންޑިޑޭޓެއްގެ ގޮތުގައި ވާދަ ކުރި ނަމަވެސް ވާނީ ވަކި ސިޔާސީ ފިކުރެއްގެ އަޅުވެތި ކަމަށް ކަމަށެވެ. ވަކި ސިޔާސީ ފިކުރެއްގެ ކެންޑިޑޭޓެއްގެ ގޮތުގައި ކުރިމަތިލުމުގެ ބަދަލުގައި ކުރިމަތި ނުލައްވާ ރަށުގެ ކަންތައްތައް ކޮށްދޭން ތިބި އިހުލާސްތެރި ރައްޔިތުން ކައުންސިލުތަކަށް ކުރިމަތިލާ ނަމަ މިނިވަންކަމާ އެކު ކުރިމަތިލުން ބުއްދިވެރި ކަމަށް އެމަނިކުފާނު ވިދާޅުވެފައިވެއެވެ.

ރައީސް ޔާމީން ވިދާޅުވި ގޮތުގައި، މިނިވަން ކެންޑިޑޭޓުންގެ ގޮތުގައި ކުރިމަތިލެއްވުމުން ފައިދާތަކެއް އެބަ ހުރި ކަމަށެވެ. އެގޮތުން ގޮނޑި ގެއްލިދާނެ ކަމަށް ސިޔާސީ ގޮތުން ދައްކާ ބިރުތަކުން ވެސް ސަލާމަތްވާނެއެވެ.

ކައުންސިލު މެމްބަރުކަމުގެ ޒިންމާ މިނިވަންކޮށް ހުރެގެން މާ ފުރިހަމައަށް އަދާކުރެވޭނެ ކަމަށާއި އޭރުން ރަށަށް ބޭނުންވާ ކަންކަން ކުރާއިރު، ރައްޔިތުންގެ ފަރާތުން ސަރުކާރާ މަޝްވަރާކުރަން ކައުންސިލުގެ ސީދާ ބާރުވެރިކަން އޮންނާނެ ކަމަށް އެ މަނިކުފާނު ވިދާޅުވި އެވެ.