ޤައުމު ކުރިޔަށް ނުދާ ކޮންމެ ދުވަހަކީ ޒުވާންޖީލުގެ މުސްތަޤުބަލުން ގެއްލޭ ދުވަހެއް ކަމަށް ޕީއެންއެފްގެ ސެކްރަޓަރީ ޖެނެރަލް މުހައްމަދު މަލީހް ޖަމާލް ވިދާޅުވެއްޖެއެވެ.
މަލީހް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ މުއިއްޒުގެ ވެރިކަމަށް 639 ދުވަސް މިއަދު ވެފައިވާއިރު މި ސަރުކާރުން މިހާތަނަށް ގެނެވުނު އަދި ބިންގާ އެޅުނު ހައުސިން ޕްރޮޖެކްޓެއް، ބުރިޖެއް، އަދި ޓަވަރެއްވެސް ނެތް ކަމަށެވެ.
މި ވެރިކަމުގެ ބާކީ 1186 ދުވަސް އޮތް އިރު ގައުމު ކުރިއަށް ނުދާ ކޮންމެ ދުވަހަކީ ދިވެހި ރައްޔިތުންނާއި ޚާއްސަކޮށް ޒުވާން ޖީލުގެ މުސްތަގުބަލުން ދުވަސްތައް ގެއްލި އެމީހުންނަށް ދެވޭ ވަރަށް ނުރަނގަޅު މެސެޖެއް ކަމަށް މަލީހް ފާހަގަކުރެއްވިއެވެ.
ސަރުކާރުގެ ވެރިން އަމިއްލަ ޖީބުތައް ފުރެންދެން "ޕާކް" މޯޑުގައި ގައުމު ނުބޭއްވޭނެ ކަމަށާއި ހުރިހާ ކަމަކަށްވުރެ ގައުމު އިސްވާންޖެހޭނެ ކަމަށް މަލީހް ވަނީ ގޮވާލާފައެވެ.
ވެރިކަމަށް 639 ދުވަސް ވީއިރު، ގައުމުގެ ހުރިހާ ދިމާލަކުން ފެނިގެންދަނީ ތަދުމަޑުކަމާއި މާޔޫސްކަން ކަމަށާއި ސަރުކާރު ހޭލަންވެއްޖެ ކަމަށް މަލީހް ވަނީ ސިފަކޮށްފައެވެ.
ސަރުކާރުގެ ތެރެއިން މުއިއްޒާއި، ސަރުކާރުގެ ވެރިން ބޭނުންހާ ގޮތެއް ހެދުމަށް ދޫކޮށްނުލުމަށް މަލީހް ވަނީ ގޮވާލާފައެވެ.
