ލޯކަލް ކައުންސިލްތަކަށް ލިބިދީފައި އޮތް ވަރަށް ގިނަ ބާރުތައް ހަނިކޮށް ފާސް ކުރި އިސްލާހުތަކަށް ތާއީދު ކުރައްވާ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.
ގާސިމް މިފަދައިން ވިދާޅުވެފައިވަނީ އޭނާ ނެރުއްވި ބަޔާނެއްގައެވެ.
އޭނާ ވިދާޅުވީ، ވިޔަފާރި ކުރުމަށާއި ތަންތަން ކުއްޔަށް ދިނުމަށާއި ތަރައްގީގެ މަޝްރޫއު ހިންގުމަށާއި މުވައްޒަފުން ނެގުމަށް ކައުންސިލުތަކަށް ލިބިދީފައިވާ ބާރުތައް އަތުލައި ލާމަރުކަޒީ ގާނޫނަށް ގެނައި އިސްލާހުތަކަކީ ވަރަށް ބޮޑަށް ބޭނުންޖެހިފައިވާ މުހިންމު އިސްލާހުތަކެއް ކަމަށެވެ.
ގާސިމް ވިދާޅުވީ، ލާމަރުކަޒީ ގާނޫނަށް ގެނައި އިސްލާހުތަކާ ގުޅިގެން މުއިއްޒު ވިދާޅުވި ވާހަކަތަކަށް އޭނާ ވެސް ތާއީދު ކުރައްވާ ކަމަށެވެ.
ގާސިމް ވިދާޅުވީ، ލާމަރުކަޒީ ގާނޫނު ކުރިން އޮތް ގޮތުން ބޮޑަށް އޮތީ ފެޑެރަލް ނިޒާމެއްގެ ސިފަތަކެއް ކަމަށެވެ. އެކަމަކު، ގާނޫނުއަސާސީގައި ބުނާ ގޮތުން ދިވެހިރާއްޖެއަކީ ޔުނިޓަރީ ދައުލަތެއް ކަމަށް އޭނާ ވިދާޅުވި އެވެ.
ގާސިމްވެސް ކައުންސިލްތަކުގެ ބާރު ކުޑަކުރުމަށް ތާއިދުކުރި އިރު 60 އަށްވުރެ ގިނަ ކައުންސިލުން ވަނީ ގާނޫނަށް ގެނައި އިސްލާހާމެދު ވަރަށް ބޮޑަށް ހިތްހަމަ ނުޖެހުން ފާޅުކޮށްފައެވެ.
