ގައުމުގައި ރައީސް ޑރ މުހައްމަދު މުއިއްޒު ނޫން އެހެން ރައްޔިތަކު ދިރިއުޅެން ނުވާނެ ކަމަށް ބުނާ ހިސާބަށް ކަންކަން ގޮއްސި ކަމަށް ކުރީގެ ނައިބު ރައީސް، ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ނޫސްވެރިން އިހުތިޖާޖު ކުރުމުން ބިލުގެ މަސައްކަތް ކުރިއަށް ނުގެންގޮސް މަޖިލީހުގެ ދައުރު ނިންމާލުމުން އެކަމަށް އިޝާރާތްކުރައްވާ ޑރ ޖަމީލު ވަނީ އެކްސްގައި ޕޯސްޓެއް ކުރައްވާފައެވެ.

އެމަނިކުފާނު ވިދާޅުވެފައިވަނީ ގައުމުގައި ދަނީ ފަހަރަކު ކަމެއް ލައިގަންނަމުން ކަމަށެވެ. އެގޮތުން ގައުމުގެ މައިގަނޑު އަސާސްތައް އަތަށް ނަގަމުން ގޮސް ރައީސް މުއިއްޒު ފިޔަވައި ގައުމުގެ އެހެން ރައްޔިތަކު ދިރިއުޅެން ނުވާނެ ކަމަށް ބުނާ ހިސާބަށް ކަންކަން ގޮއްސި ކަމަށެވެ.

ޖުޑިޝަރީ އާ މިނިވަން މުވަައްސަސާތަކާ ލާމަރުކަޒީ ނިޒާމާ ބަޖެޓާ މާލީ ނިޒާމުވެސް ރައީސް މުއިއްޒުގެ މުށުތެރެއަށް ލުމަށް ފަހު މިއަދު މީޑިއާއަށް ނުފޫޒުފޯރުވަނީ ކަމަށް ވިދާޅުވެފައިވެއެވެ. އެގޮތުން އެމަނިކުފާނު އެކަން ސިފަކުރެއްވީ މީޑިޔާތައް ނޮޅާލުމުގެ ގޮތުގައެވެ.