ދެކުނު އެފްރިކާއިން އިންޓާނޭޝަނަލް ކޯޓު އޮފް ޖަސްޓިސް- އައިސީޖޭގައި އިސްރާއީލާ ދެކޮޅަށް ހުށަހެޅި ނަސްލު ނައްތާލުމުގެ މައްސަލައަށް ތާއީދު ފާޅުކުރާ ގައުމުތަކުގެ ލިސްޓުގައި ރާއްޖެ، ނަމީބިއާ އަދި ޕާކިސްތާން ބައިވެރިވެއްޖެއެވެ.

އަންގާރަ ދުވަހު އދ. ގެ އާންމު މަޖިލީހުގައި މި ތިން ގައުމުން ވަނީ މި މައްސަލައަށް ތާއީދުކުރާކަން ހާމަކޮށްފައިއެވެ.

ނަމީބިއާގެ ސަފީރު ނެވިލް ގާޓްޒޭ އދ އަށް ވިދާޅުވީ އޭނާގެ ގައުމުން ދެކުނު އެފްރިކާގެ މައްސަލައަށް "މަރުހަބާ ކިޔާ ތާއީދު" ކުރާ ކަމަށެވެ. "ނަމީބިއާ އިން ދެކުނު އެފްރިކާއިން ހުށަހަޅާ މައްސަލަ ދެނެގަނެ، އެ މައްސަލައަށް ފުރިހަމައަށް އެއްބާރުލުންދެން،" ގޭރްޓްޒޭ ވިދާޅުވި އެވެ.

ސައުތު އެފްރިކާއިން ހުށަހަޅާފައިވާ މި މައްސަލައަށް މީގެ ކުރިން ތާއީދު ފާޅުކޮށްފައިވާ އެހެން ގައުމުތަކުގެ ތެރޭގައި ބޮލީވިއާ، އުރުދުން، މެލޭޝިއާ އަދި ތުރުކީ ހިމެނެ އެވެ.

މި ހަފްތާގެ ބުރާސްފަތި އަދި ހުކުރު ދުވަހު ވަގުތީ ފިޔަވަޅުތަކަށް ބެލުމަށް އައިސީޖޭއިން އަޑުއެހުންތައް ބާއްވާން ވަނީ ތާވަލުކޮށްފައިއެވެ.

ނިމިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހުން ފެށިގެން އިސްރާއީލުން ފަލަސްތީނަށް ދެމުން އަންން ހަމަލާތަކުގައި މިހާތަނަށް ފަލަސްތީނުގައި 23،000 މީހުން ޝަހީދުވެފައިވާއިރު، މީގެ ތެރޭގައި ގިނަ އަދަދެއްގެ ކުޑަ ކުދިންނާއި އުމުރުން ދުވަސްވީ މީހުން ހިމެނޭކަން ފާހަގަކޮށްލެވެއެވެ.